رہبرانقلاب اسلامی آیت اللہ العظمی سید علی خامنہ ای نے اتوار کی صبح مسلح افواج کے کمانڈروں، فوجیوں اور شہدا کے اہل خانہ سے خطاب میں فرمایا کہ دنیا کی بہت سی افواج فتح یا شکست کے مواقع پر عالمی قوانین اور انسانی اصولوں کی پابندی نہیں کرتی ہیں اور اس کا واضح نمونہ دنیا کی بڑی طاقتوں بالخصوص امریکہ ہے جو عالمی قوانین اور انسانی اصولوں کو خاطر میں نہیں لاتا ہے اور ہر طرح کے جرائم کا ارتکاب کرتا ہے- رہبر انقلاب اسلامی نے یمن کے واقعات، غزہ کی جنگ، اور لبنان کی جنگ کو عالمی قوانین پر کاربند نہ رہنے کے نمونے قرار دیا- آپ نے فرمایا کہ ایران کی مسلح افواج اسلامی قوانین اور اصولوں کی پابند ہیں اور کبھی بھی خواہ کامیابی کی منزل ہو تو سرکشی نہیں کرتیں اور خطرے کے موقع پر ممنوعہ طریقے اور وسائل استعمال نہیں کرتیں- رہبرانقلاب اسلام نے امریکہ کی شرمناک دھمکیوں کی طرف اشارہ کرتے ہوئے فرمایا کہ ہمارے مدمقابل نے کچھ دنوں خاموشی اختیار کرنے کے بعد حال ہی میں دوبارہ ہمارے خلاف تمام آپشن کھلے ہونے کی بات کی ہے، وہ ایک طرف تو اس طرح بڑے بول بولتے ہیں اور دوسری طرف کہتے ہیں کہ اسلامی جمہوریہ ایران کو دفاعی شعبے میں اپنی ترقی پیشرفت روک دینی چاہیے جو کہ ایک احمقانہ بات ہے- رہبر انقلاب اسلامی نے فرمایا کہ ایران کبھی بھی ان احمقانہ باتوں کو تسلیم نہیں کرے گا اور ملت ایران نے ثابت کر دیا ہے کہ اگر اس پر حملہ کیا جائے تو وہ مکمل اور بھرپور طرح سے اپنا دفاع کرے گی اور بند مٹھی کی طرح مضبوط اتحاد کے ساتھ غیرمنطقی جارح دشمن کے مقابل ڈٹ جائے گی- رہبر انقلاب اسلامی نے امریکہ، یورپی ممالک اور ان کے پٹھو ممالک کی جانب سے اس افسانے کے گھڑے جانے کی طرف کہ ایران ایٹم بم حاصل کرنا چاہتا ہے اور وہ خطرہ شمار ہوتا ہے اشارہ کرتے ہوئے فرمایا کہ علاقے اور دنیا کے لئے آج سب سے بڑا خطرہ امریکہ اور صیہونی حکومت ہیں جو بغیر کسی روک ٹوک کے ، انسانی اور دینی اصولوں اور اقدار کو روندتے ہوئے جہاں چاہتے ہیں مداحلت کرتے ہیں اور قتل عام شروع کر دیتے ہیں-