ٹی وی شیعہ[بین الاقوامی ذرائع ابلاغ]بیجنگ (اے این این) امریکی وزیر ِدفاع چک ہیگل چین کے تین روزہ سرکاری دورے پر ہیں جس کا مقصد امریکہ اور چین کے درمیان فوجی تعلقات مضبوط بنانا ہے۔ امریکی وزیر ِدفاع نے نومبر میں مشرقی بحیرہ ِ چین میں جاپان کیساتھ متنازعہ علاقے پر چین کی طرف سے اپنی دفاعی فضائی حدود وضع کرنے کے فیصلے کو تنقید کا نشانہ بنایا۔ انکا کہنا تھا پہلی بات تو یہ ہے کہ ہر قوم کو اپنی دفاعی فضائی حدود وضع کرنے کا حق ہے مگر ایسا یکطرفہ طور پر بغیر کسی مشاورت کے نہیں کیا جا سکتا۔ اسطرح کے اقدامات سے تنائو اور غلط فہمیوں کو جنم ملتا ہے جو بعد میں خطرناک صورت اختیار کر سکتے ہیں۔ دورہ ِجاپان کے دوران ہیگل کا صحافیوں سے ملاقات میں کہنا تھا کہ چین کو اپنے پڑوسیوں کیساتھ زیادہ بہتر اور لحاظ کا رشتہ استوار کرنا چاہیے۔امریکی وزیر ِ دفاع کی تنقید کا جواب دیتے ہوئے چینی وزیر ِدفاع چینگ وینکوین کا موقف تھا کہ چین جاپان کو کبھی بھی بیجا طور پر نہیں اکسائیگا مگر دوسری جانب اپنی حدود کا دفاع کرنے کیلئے ہمیشہ چوکس رہیگا۔ جاپان کیساتھ متنازعہ جزیروں کا معاملہ چین افہام و تفہیم سے حل کرنے کیلئے تیار ہے۔