صفدرہمدانی

قاتلوں سے گفتگو کی ابتدا ہونے لگی
شرم کی بے غیرتی کی انتہا ہونے لگی
ظلم کے ہاتھوں پہ بیعت جوں روا ہونے لگی
زندگی اب جس طرح سے اک سزا ہونے لگی

لوٹ ڈالا قافلے کو قافلہ سالار نے
بات پھیلا دی وطن میں سرخیء اخبار نے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قاتلوں سے امن کے طالب ہیں اپنے حکمراں
گفتگو کی بھیک مانگی جا رہی ہے الاماں
حاکموں پر ہو رہا ہے طالبانوں کا گماں
کب تلک دیں گے عوام اس ملک کے اب امتحاں

دشمن انسانیت سے امن جو مطلوب ہے
یہ فقیہ شہر یا پاگل ہے یا مجذوب ہے
۔۔۔۔۔۔۔۔۔۔۔۔۔۔۔۔

ان شہیدوں کے لہو کا کون دے گا اب جواب
کھو گیا ہے وہ کہاں جو لارہا تھا انقلاب
شر کے ان سب بانیوں کا کیوں نہیں ہے احتساب
ظلم بھی کار ثواب ہے جرم بھی کار ثواب

خوں رنگے ہاتھوں سے کیسے ہو سکے تکمیل امن
بڑھ کے اس سے اور کیا ہو گی بھلا تذلیل امن
۔۔۔۔۔۔۔۔۔۔۔۔۔۔
سر کٹی لاشوں سے آتی ہے صدائے احتجاج
کیا یہی ہے ظلمِ ظالم ختم کرنے کا علاج
چپ ہے کیوں بتلایئے گونگا ہے کیا سارا سماج
چند دن کی ہے حکومت چند دن کا تخت وتاج

خوں جو سڑکوں پر بہا مت اسکا سودا کیجئے
امت مظلوم کو مت اور رسوا کیجئے
۔۔۔۔۔۔۔۔۔۔۔۔
یہ بھی صفدر کیاعجب ہے حکمت پروردگار
دشمن امن و اماں ہے امن کا اب پاسدار
کوئی اب کیسے کرے ان رہبروں پر اعتبار
بے گناہ لوگوں کے قاتل باعث صد خلفشار

اپنے ہی ہاتھوں سے یہ سب خود ہی عریاں ہو گئے
ملک کے اندر کے طالب بھی نمایاں ہو گئے۔

http://www.aalmiakhbar.com/index.php?mod=article&cat=urducolumn&article=...