سب سے اولیٰ و اعلیٰ ہمارا نبی[ص]

سب سے بالا و والا ہمارا نبی[ص]

اپنے مولیٰ کا پیارا ہمارا نبی[ص]

دونوں عالم کا دولہا ہمارا نبی[ص]

بزمِ آخر کا شمعِ فروزاں ہوا

نورِ اول کا جلوہ ہمارا نبی[ص]

جس کو شایاں ہے عرشِ خدا پر جلوس

ہے وہ سلطانِ والا ہمارا نبی[ص]

بجھ گئیں جس کے آگے سب ہی مشعلیں

شمع وہ لے کر آیا ہمارا نبی[ص]

جس کے تلووں کا دھون ہے آبِ حیات

ہے وہ جانِ مسیحا ہمارا نبی[ص]

عرش و کرسی کی تھیں آئینہ بندیاں

سوئے حق جب سدھارا ہمارا نبی[ص]

خلق سے اولیاء ، اولیاء سے رسل

اور رسولوں سے اعلیٰ ہمارا نبی[ص]

حسن کھاتا ہے جس کے نمک کی قسم

وہ ملیحِ دل آرا ہمارا نبی[ص]

ذکر سب پھیکے جب تک نہ مذکور ہو

نمکین حسن والا ہمارا نبی[ص]

جس کی دو بوند ہیں کوثر و سلسبیل

ہے وہ رحمت کا دریا ہمارا نبی[ص]

جیسے سب کا خدا ایک ہے ویسے ہی

اِن کا اُن کا تمہارا ہمارا نبی[ص]

قرنوں بدلی رسولوں کی ہوتی رہی

چاند بدلی کا نکلا ہمارا نبی[ص]

کون دیتا ہے دینے کو منھ چاہئے

دینے والا ہے سچا ہمارا نبی[ص]

کیا خبر کتنے تارے کھلے چھپ گئے

پر نہ ڈوبے نہ ڈوبا ہمارا نبی

مُلکِ کونین میں انبیاء تاجدار

تاجداروں کا آقا ہمارا نبی[ص]

جس نے ٹکڑے کئے ہیں قمر کے وہ ہے

نورِ وحدت کا ٹکڑا ہمارا نبی[ص]

سب چمک والے اُجلوں میں چمکا کئے

اندھے شیشوں میں چمکا ہمارا نبی[ص]

جس نے مردہ دلوں کو دی عمرِ ابد

ہے وہ جانِ مسیحا ہمارا نبی[ص]

غمزدوں کو رضا مژدہ دیجے کہ ہے

بیکسوں کا سہارا ہمارا نبی[ص]