د ننګرهار امنیتي چارواکي وایي، چې اچین ولسوالۍ کې د خپل ماین چاودنې له امله ۳۳ تنو داعش وسله والو ته مرګ ژوبله اوښتې ده. د سېلاب قول اردو وايي چې په اچين ولسوالۍ کې د داعش ٣٣ وسله والو ته د خپل ماین چاودنې مرګ ژوبله اړولې ده. په ختيځ کې د سېلاب قول اردو مطبوعاتي دفتر له خوا په يوه رالېـږل شوې خبرپاڼه کې راغلي چې دا چاودنه پرون ناوخته د ننګرهار ولايت د اچين ولسوالۍ د مزدکي په سيمه کې شوې ده. سرچينې زياته کړه، داعش وسله والو غوښتل چې دغه ماين له يادې سيمې د ولسوالۍ د شډل بازار ته ولېږدوي او هلته يې ځاى پر ځاى کړي، خو په خپله پرې چاودېدلى دى. په خبرپاڼه کې راغلي چې په دې چاودنه کې د داعش ١٢ وسله وال وژل شوي او ٢١ نور ټپيان دي. اچين د ننګرهار ولايت لرې پرته او نا امنه سيمه ده، له هغه ځايه له خپلواکو سرچينو څخه د کره معلوماتو ترلاسه کول ستونزمن کار دى او په اړه یې ډېره اتکا پر دولتي سرچينو کېږي. بلخوا د ملي امنيت لوى رياست ويلي چې موظفينو يې په ننګرهار ولايت کې د عملياتو پر مهال د وسله والو مخالفينو اوه کسيزه ډله چې غوښتل يې په جلال اباد کې بريدونه ترسره کړي  نيولې ده. وسله والو مخالفينو تر اوسه په دې اړه څه نه دي ويلي.