دپاکستان لومړي وزیر نوازشریف بیګا خپل ملت ته په یوې (۱)وینا کښې په تیره اونۍ کښې دپیښور ترخې پیښې ته په اشارې سره چې د دولسو(۱۲) معلمانو په شمول د پوځ دښوونځي د ۱۵۰ زده کونکو د وژلې سبب شوه ترهګرو ته واضح پیغام وو چې ملت فیصله کړي ده او نور دترهګرو اخرې ورځې رارسیدلي دي .
دپاکستان لومړي نوازشریف وزیر وویل د هیواد دپارلماني او سیاسي ګوندونو په غونډې کښې دغه موافقه شوي ده چې نور باید له هیواد څخه ترهګرۍ ختمه شي او دترهګرو د محاکمه کیدا او پانسۍ کیدا لپاره تر دوو (۲)کلونو پورې پوځي عدالتونه جوړه شي او دهغو ترهګرو د پانسي کیدا چې په مرګ محکوم شوي دي دپانسي کیدا لړۍ هم شروع شوي ده .
دپاکستان لومړي وزیر نوازشریف دغه راز ډاګینه کړه دغه فیصله شوي ده چې له ترهګرو ډلو او ټروریسټانو سره ټولې مالي سرچینې او مرستې وپیژندل شي او هغه بندې شي .
هغه وویل که چیرې نن دترهګرۍ جرړه وچه نکړو تاریخ به هیڅ کله مونږ ونه بخښي او دسبا ورځې پاکستان به دنن ورځې له پاکستان سره متفاوت او بدل وي .
دویلو ده که څه هم په پاکستان کښې دترهګرو له هر جنایته وروسته حکومت او پوځ دترهګرو په جرړه ایستلو ټینګار کړی دی خو د وخت په تیریدا سره موضوع سړه شوي خو داځل موضوع فرق کوي .
دطالبانو دجنایت سختوالی په تیره بیا داچې ددغه ډلې په حملې کښې زیات وژل شوي کسان د پوځيانو زامن دي او دغه جنایت سبب شوی دلومړي ځل لپاره د طالبانو ډلې او دهغې د جرړه دایستلو لپاره د حکومت ، پوځ او سیاسي ګوندونو یوشان کامل نظر رامینځته شي .
حتی د پاکستان دپوځ مشر جنرال راحیل شریف د جاسوسۍ ادارې ايي ایس اي (ISI) له مشر جنرال رضوان اختر سره یوځاې دپیښور له حملې یوه (1)و رځ وروسته کابل ته بیړنی سفر وکړ او دافغانستان او ناټو له چارواکو سره په خپلو کتنو کښې یې له ترهګرو سره دجدي مبارزې غوښتنه وکړه .
له دې وروسته په افغانستان کښې دناټو قوماندان او دافغانستان دپوځ قوماندان هم پاکستان ته ورغلل او دپاکستان دپوځ له مشر جنر ال راحیل شریف سره په کتنې کښې له ترهګرو سره د مبارزې لپاره ددرې(۳) اړخیزه مرستې په باره کښې موافقې ته ورسیدل .
اوس دغه پوښتنه مطرح ده چې ایا داځل هغه اراده چې دپاکستان لخوا دترهګرۍ دجرړه دایستلو لپاره اعلان شوي واقعا د زړه له کومې ده او عمل به ورباندې وشي .؟ یا دتیرو وختونو په شان به هیره کړې شي .؟ چې په ځواب کښې باید ووایو د افغانستان او سیمې د مسایلو د کارپيژاند ډاکټر محمد اکبر وردک چې په فرانسې کښې هستوګن دی ، دافغانستان په علومو اکیډمۍ کښې د اریانا دایره المعارف د برخې دمشر حبیب الله رفیع او دپاکستان په بلوچستان صوبې کښې د پیپلز ګوند د عمومي منشي بسم الله خان کاکړ په شمول د پاکستان او افغانستان دسیاسي مسایلو ډیرو کارپيژاندو له تهران راډیو سره په مرکو کښې له ترهګرۍ سره دمبارزې لپاره دپاکستان په دغه ارادې شک لري او اعتراف کوي تر هغه وخته چې دپاکستان سیاست او ستراتژۍ چې پراساس یې ترهګر تولیدیږي او له هغوې د افغانستان او ځینو نورو هیوادونو پرضد د اوزار په توګه استفاده کیږي بدله نشي د څوسوو ترهګرو په پانسي کیدا او دترهګرو پرضد په عملیاتو سره به ترهګرۍ ختمه نشي .
فرضا که چیرې دغه ترهګر چې ټولو ته معلوم دي او ټول له مینځه لاړ هم شي خو دپاکستان سیاست او ستراتژۍ بدله نشي سبا به په نورو نویو نومونو سره نورې ترهګرې ډلې جوړې شي .
دپاکستان او افغانستان دسیاسي چارو کارپیژاندو بسم الله خان کاکړ، حبیب الله رفیع او محمد اکبر وردک چې له تهران راډیو سره یې مرکې کړي دي داسې نظر لري امریکا هم په دې زمینه کښې له پاکستان سره غږمله ده او نه غواړي په افغانستان او سیمه کښې جنګ ختم شي او د پاکستان دپیښور د وروستۍ حملې په شمول دترهګرو ټول فعالیتونه دامریکا په کاملې غږملتیا سره کیږي چې سیمه دتل لپاره ناکراره و ي چې دا په افغانستان او سیمه کښې دامریکا دپوځي شتون ددوام لپاره په امریکا کښې د عمومي افکارو د قانع کولو لپاره ترټولو ښه پلمه ده .
باید ووایو هغه هدفونه چې امریکا یې په سیمه کښې دخپل شتون د دوام لپاره تعقیبوي په خپله د پاکستان او ددغه هیواد اټومي تاسیسات په باره کښې دي وکولای شي په نړیوالې ټولنې ومني دپاکستان حکومت داټومي وسلو دساتلو صلاحیت نلري او ممکنه ده چې اټومي وسلې د ترهګرو لاس ته ورشي .
پردې اساس دپاکستان دغه اټومي وسلې نړیوالو ځواکونو چې په حقیقت کښې امریکا ده وسپارل شي .