د ايران د بهرنيو چارو وزير محمد جواد ظريف د نړۍ د مختلفو هېوادونو د بهرنيو چارو وزيرانو ته په بيله بيلو ليکونو کښې د اېټمي خبرو اترو په حقله د ايران د اسلامي جمهوريت اصولي دريځونه بيان کړل.
د ايران د بهرنيو چارو وزير په دغه ليک کښې چې پرون خپور شو تاکيد وکړ، د ايران اسلامي جمهوريت د خبرو اترو په مخ بيائيلو لپاره يو لړ عملي، متوازنې او حقيقت پسندانه حل لارې وړاندې کړې دي او د متقابلو ګټو او احترام په بنياد يو عادلانه او عاقلانه موافقې ته د رسېدو لپاره يې خپله کلکه اراده ښودلې ده، خو ظريف څرګنده کړې ده چې ايران په دغو خبرو اترو کښې د ناروا او له سپکاوي نه د ډکو غوښتنو په وړاندې ټينګ ولاړ او په پرېکنده توګه هغه ردوي.
هغه ډول چې د ايران د بهرنيو چارو وزير په دغه ليک کښې بيان کړي دي د ايران اسلامي جمهوريت د ګډ اقدام د پروګرام په چوکاټ کښې بشپړه اېټمي موافقې ته د رسېدو په خاطر د دغو خبرو اترو لپاره يو ګډ هدف په نظر کښې لرلے دے. چې دغه هدف د موافقې په اړه يوې داسې بشپړه اوږد مهالي حل لارې ته رسېدل دي چې د دې ضمانت ورکړي چې د ايران اېټمي پروګرام به منحصراً سوله ايز وي.
په تېره بيا له تېرې جنورۍ څخه تر اوسه د ګډ اقدام د پروګرام له اجرا نه وروسته ايران دا ښودلې ده چې دغه هدف ته رسېدل ګران کار نۀ دے. هم هغه ډول چې د ايران د بهرنيو چارو د وزير په ليک کښې بيان شوي دي ايران په ډېره اوچته سطح او د اسلامي انقلاب د معظم رهبر لخوا په وضاحت سره د ډله ايزو وژلو له هر ډول وسلو سره خپل مخالفت بيان کړے دے او د اېټمي وسلو توليد او له هغو څخه استفاده حرامه بولي.
په دې باره کښې د ايران واضح او صفا دريځ په ملګرو ملتو کښې د يو رسمي سند په توګه ثبت شوے دے. د ايران اسلامي جمهوريت په بنيادي توګه او د ديني او اخلاقي تعليماتو له مخې نۀ د اېټمي وسلو غوښتونکے دے او نۀ ورته څه ضرورت لري.
خو په اېټمي خبرو اترو کښې په دې باره کښې د ايران له اعتقادي باورونو او کردار نه علاوه په فني بحثونو کښې يې هم رغانده چلند لرلے دے او د اژانس او د دغې ادارې د رپوټونو په استناد ايران د اېټمي فني خبرو اترو په چوکاټ کښې چې مهم عنوان يې د يورانيمو د پخولو بحث دے يو شفاف چلند او واضحه دريځ لري.
دغه تګلاره ښودنه کوي چې ايران د تعامل او روغې جوړې خاوند دے،هغه اقدامات چې مقصد يې د يو نمائشي پروګرام تر حده د ايران د يورانيمو د پخولو د پروګرام محدودول دي نۀ مني.
له دې امله چې د ايران د بهرنيو چارو وزير د نړۍ د هېوادونو د بهرنيو چارو وزيرانو ته په خپل ليک کښې له روغ نيت سره مل عمل کونې په ضرورت تاکيد وکړ او څرګنده يې کړه چې داسې خبرې اترې پکار دي د د ايران له اېټمي پروګرام سره اړوند د ملګرو ملتو د امنيت د شورا د بائيکاټونو او څو اړخيزه او ملي بائيکاټونو په بشپړه توګه د ختمولو سبب شي. خو لويديځ او په خاصه توګه امريکې دغه اصل باندې عمل نۀ دے کړے.ان تردې چې د ايران د بهرنيو چارو وزير په دغه ليک کښې ويلي دي چې بائيکاټونو ته سخته ګروهنه نۀ يوازې د يوې بشپړه اوږد مهالې موافقې د ترلاسه کولو په لاره کښې خنډ رامنځته کړے دے بلکې د دې سبب شوې ده چې د ګډ پروګرام د اقدام د پروګرام له جوړېدو وروسته هم يې بيا د ايران د خلقو اعتماد تر لاسه نه کړې شو.
د دې باوجود خبرو اترو ته د ايران د بهرنيو چارو د وزير نظر مثبت دے خو هغه څه چې اړتيا لري، راتلونکي ته کتنه، سياسي اراده، د حقائقو منل او د يو صحيح انتخاب د غوره کولو جسارت دے.
په هر حال اېټمي خبرې اترې اوس په داسې لاره کښې دي چې کولې شي موافقې ته د رسېدو لپاره کار اسان کړي، خو دغه خبرې اترې په عېن حال کښې سختې دي او د موافقې په لاره کښې يو لړ خنډونه لري. د دغو خنډونو لرې کول د امريکې د تېرو روشونو او تګلارو له بدلېدو سره تړاو لري. ځکه چې په خبرو اترو کښې د ايران سرې کرښې څرګندې دي او ايران به له خپلو اصولي دريځونو او حقوقو څخه په شا تګ ونۀ کړي.