دافغانستان دطالبانویوه پخواني مسئول مقام او لیکوال عبدالرحیم مسلم دوست وايي اسلامي حکومت سره یې بیعت کړی خو ددغې ډلې لخوا د خراسان امیر نه دی ټاکل شوی.
څه موده وړاندې پاکستانيو رسنیو خبر ورکړی و چې داعش ډلې یو افغان پخوانی مسئول مقام او لیکوال عبدالرحیم مسلم دوست د خراسان د سیمې د مشر په توګه ټاکلی.
د خراسان په سیمه کې افغانستان، پاکستان، هند، مینځنۍ اسیا، بنګلادیش او د سیمې نور هېوادونه شامل دي.
خو عبدالرحیم مسلم دوست نن رسنیو ته یو غږیز پیغام په لېږلو سره د پاکستانيو رسنیو راپورونه په کلکه رد کړي دي.
هغه ویلي چې ځينې ترپردې شا کړۍ د دې بې اساسه خبر تر شا لاس لري او ددغه ډول خبرونو په خپرولو سره دوی غواړي چې هغه ته ستونزې پیدا کړي.
مسلم دوست د امریکايي یرغل په پيل کې پاکستانيو عسکرو نیولی ؤ او بیا ئې امریکا ته سپارلی ؤ چې به ګوانتانامو کې له ۴ کاله بند تیرولو وروسته بېرته خوشې شو.
مسلم دوست تر خوشې کیدو وروسته د «ګوانتنامو ماتې زولنې» په نوم کتاب ولیکلو، په دغه کتاب کې د ګوانتنامو، پاکستاني او افغانستان زندانونو په اړه د نوموړي خاطرې لیکل شوي.