د پاکستان د کورنیو چارو پخواني وزیر رحمان ملک ویلي، چې د داعش وسله والې ډلې مخه بايدونیول شوي او که نه د دې امکان شته، چې دغه ډله په پاکستان کې پرمختګ وکړي.
د نوموړي په وينا: «د پاکستان حکومت یوه میاشت وړاندې دا رد کړې وه، چې د داعش وسله واله ډله په پاکستان کې شتون لري خو اوس دولت چوپتیا غوره کړې چې دا چوپتیا زموږ او نړۍ د پاره ستر ګواښ کېدای شي.»
نوموړي رسنیو ته ویلي«د دې ډلې مشر محمد المهاجر یوه ویډیو د پنجاب په ګجرانو سیمه کې ثبت کړې او د دې سیمې او د پاکستان په نورو ښارونو کې د داعش وسله والې ډلې، خپل شعارونه لیکلي او خپاره کړي دي.»
د يادونې ده، چې داعش د نړۍ په مختلفو هېوادونو کې خپل پلويان موندلي، چې د پاکستان تر څنګ افغانستان او د منځنۍ آسيا هېوادونو کې هم شتون لري.
د تاجکستان ؤلس مشر،امامعلی رحمان هم ويلي، چې له تاجکستان څخه په سلګونو ځوانان د جګړې لپاره عراق او شام ته رسيدلي، تر څو له داعش ډلې سره يوځای شي .