د پاکستان دپوځ مشر جنرال راحیل شریف پرون کابل ته لاړ او هلته یې دافغانستان له ولسمشر اشرف غني او دایساف دځواکونو له قوماندان جنرال جان ایف کیمپبیل سره خبرې وکړې .
دپاکستان دپوځ مشر دافغانستان له ولسمشر اشرف غني او دایساف ځواکونو له قوماندان کیمپبیل سره د امنیتي او د افغانستان او پاکستان په سرحدي سیمو کښې دحالاتو په باره کښې دنظر تبادله وکړه .
دپاکستان دپوځ مشر چې د آي ایس آي مشر هم ورسره ؤ دافغانستان له ولسمشر او دایساف دځواکونو له قوماندان سره په خبرو کښې مهم استخباراتي معلومات په تیره بیا دپیښور دپرون ورځې د حملې په باره کښې اطلاعات شریک کړل .
دافغانستان ولسمشر اشرف غني دپاکستان دپوځ مشر راحیل شریف ته ډاډ ورکړ چې اجازه به ورنکړل شي چې دافغانستان خاوره دپاکستان پرضد د ترهګرو دفعالیتونو لپاره استعمال شي او که چیرې په دې هکله کوم نښه ولیدل شي نو سمدستي به له مینځه یوړل شي .
دپاکستان دپوځ مشر راحیل شریف هم د ترهګرو پرضد دګډو اقداماتو په شمول په ټولو زمینو کښې دافغانستان دملي وحدت دحکومت دملاتړ کولو لپاره افغان ولسمشر ته ډاډ ورکړ .
دافغانستان ولسمشر او دپاکستان دپوځ مشر دغه راز ژمنه وکړه چې په ګډه دترهګرۍ پرضد مبارزه وکړي .
پاکستان په افغانستان تور لګوي چې دپاکستان دطالبانو ډلې غړیو ته پناه ورکوي او په ځواب کښې افغانستان اکثره په ګاونډي هیواد پاکستان تور لګوي چې دافغانستان په سرحدي سیمو کښې طالبانو ته پناه ورکوي
د پاکستان رسنیو ولیکل کابل ته د راحیل شریف سفر له افغانستانه د پاکستاني طالبانو د مشر ملا فضل الله د غوښتنې په موخه ؤؤ خو مالومه نه ده چې افغان چارواکو به د پاکستان د فوځ د مشر دا خبره منلې وي که څنګه .
د پاكستان د اېكسپرس تربيون د ورځپاڼې د خبر په اساس پاكستاني نظامي چاوراكو ګواښ كړى دى چې كه چېرې د تحريك طالبان پاكستان د مشرانو په نيولو كې افغانستان مرسته ونكړي او يا هم پر پاكستان د نوموړې ډلې په بريدونو كې پاتې راشي نو دوى به په افغانستان كې د فوځي عملياتو په پیلولو فکر وکړي .