د پاکستان د پوځ د عامه اړیکو مشر جنرال عاصم سلیم باجوه وايي چې پرون د دغه هیواد د تاریخ ترټولو توره ورځ وه. د هغه په وینا په پیښور ښار کښې په پوځ پورې په اړوند خصوصي او پرائیویټ ښوونځي باندې د پرونۍ ترهګرۍ حملې له امله ۱۳۲ زده کونکي او ۹ ښوونکي یا معلمان وژل شوي او ۱۲۱ زده کونکي او درې استاذان ژوبل شوي دي. د ترهګرو په خلاف د عملیاتو په دوران کښې د پوځ د دوو افسرانو په شمول اوه ځواکونه هم زخمي شول او همداشان ۷ ترهګر چې ټولو ځانمرګي جاکټونه اغوستي وو، ووژل شول.
البته د طالبانو ډله چې د دې حملې مسئولیت یې منلی دی، وايي چې د دغې ډلې شپږو کسانو په دغه سکول برید کړی. د پاکستان د پوځي سرچینو په حواله ترهګرو د څو ورځو خوراکي او د مهماتو ذخیره هم له ځان سره لرله او د طالبانو ویاند خراساني چې د دې حملې پړه یې منلې وايي چې دا حمله په شمالي وزیرستان کښې د پاکستان د پوځ د عملیاتو په بدل کښې شوې ده.
باید ووایو چې د پیښور پرونۍ پیښه د ختیځ پاکستان د پرزیدو له کلیزې سره په یو وخت وه چې د ۱۹۷۱ کال په همدې ورځ له لویدیځ پاکستان یعنې اوسني پاکستان څخه د ختیځ پاکستان په بیلیدو سره د بنګلا دیش په نامه یو نوی هیواد جوړ شو. د ځینو شناندو او نظر خاوندانو په باور پرونۍ ترهګره حمله تصادفي او اتفاقي نه وه بلکې د ختیځ پاکستان د بیلیدو په ورځ د یو پلان شوي پروګرام په اساس یې بڼه ونیوله. په همدې وجه د نظر خاوندان پرونۍ ترهګره حمله د پاکستان په خلاف یوه بهرنی دسیسه ګڼي. که چیرې داسې وي نو آیا د هغو کسانو یا هغو حکومتي چارواکو سترګې به خلاصې شي چې طالبان د پاکستان سټراټیجکه پانګه ګڼي او که نه؟ او آیا بیا به هم د طالبانو د دې جنایت توجیه کولو ته مخه کړي؟
که څه هم سیاسي او مذهبي ګوندونو او ډلو د پيښور پیښه سخته غندلې او حتی د پاکستان تحریک انصاف مشر عمران خان چې تراوسه به یې د طالبانو جنایتونه نه غندل او د هغوي ملاتړ به یې کوه، هم پرونۍ حمله وغندله او سره له دې چې نوازشریف د وزیراعظم په توګه نه مني خو د هغه په مشرۍ په ننۍ غونډه کښې ګډون ته یې غاړه کیښودله او وې ویل چې په خیبر پښتونخوا کښې د تحریک انصاف صوبايي حکومت او مرکزي حکومت او پوځ دې د ترهګرۍ د ختمولو لپاره یوه خوله او یوموټی شي. د پاکستان پخواني ولسمشر آصف علي زرداري هم د پيښور د جنایت د غندلو په ترڅ کښې وویل: د پاکستان بوکوحرام چې د افریقې بوکوحرام ډلې ته ورته ترهګر دي، سکول په نښه کړ. زرداري ټینګار وکړ چې پکار دي د هغو خلکو سترګې وغړیږي چې حکیم ا... محسود ته شهید وايي.
وزیراعظم نوازشریف هم پرون د پاکستان د پوځ له قومندان راحیل شریف سره په کتنه کښې چې په پيښور کښې وشوه، وویل: ترهګر دې واوري چې مونږ به ترې د خپلو ماشومانو د وینې د یو یو څاڅکي بدل واخلو.
له بلې خوا په پاکستان کښې دننه او هم په نړیواله کچه د پیښور پرونۍ زړه دړدونکې پیښه په سخته وغندله شوه. په تیره بیا د پاکستان خلک له ترهګرو سره د جدي چلن غوښتونکي شول.
خو په خواشینۍ سره د خلکو لخوا د سختو غندنو او مخالفتونو سره سره بیا هم داسې کسان شته چې د پیښور د پروني جنایت غندلو ته تیار نه دي. لکه په اسلام آباد کښې د لال مسجد خطیب مولانا عبدالعزیز چې له یو ټي وي چینل سره په مرکه کښې دې ته چمتو نه شو چې د پیښور پيښه وغندي او په یو ډول یې هڅه کوله چې دا جنایت توجیه کړي او هغه د طالبانو په خلاف د پوځ یا حکومت د اقداماتو په وړاندې د طالبانو د ډلې غبرګون وبولي. د پاکستان په نظام کښې دننه او بهر داسې کسان او شخصیتونه هم ډیر دي چې طالبان د پاکستان لپاره یوه سټراټیجکه پانګه ګڼي او ترڅو پورې چې په پکستان کښې دا ډول تفکر چې له بهر (سعودي عربستان او حتی له امریکې) څخه یې حمایت او فکري او مالي ملاتړ کیږي، له مینځه ولاړ نه شي او ورسره په عملي توګه مبارزه ونه شي او علتونه یې ختم نه کړې شي، د څو تنو ترهګرو په وژلو سره به په پاکستان کښې ترهګري هیڅکله ختمه نه شي او دا طرزِ تفکر په حقیقت کښې د پاکستان او د اسلام د دښمنانو طرز تفکر دی او د همدې طرز تفکر په وجه په کال ۱۹۷۱ میلادي کال کښې ختیځ پاکستان بیل شو. همدا طرز تفکر دی چې له امله یې د پاکستان هیڅ کوم ګاونډی له دغه هیواد نه خوشال نه دی او ویلې شو چې پاکستان په یو ډول په زوال کښې پریوتی دی. طالبان چې د پاکستان د سټراټیجکو موخو د پوره کیدو لپاره جوړ شوي دي نن سبا پخپله د پاکستان او د دغه هیواد د خلکو لپاره سرخوږی جوړ شوی دی. که څه هم په پاکستان کښې ولسي حکومتونو هڅه کړې ده چې په دې هیواد کښې د ترهګرې جرړه وباسي خو له دې امله چې ولسې حکومتونه تل د پاکستان د پوځ او آيي ایس آيي په وړاندې کمزوري او عاجز دي نو په دې وجه په دې لړ کښې هم هیڅ نه شي کولی په تیره بیا دا چې د پاکستان ستر سیاستونه په تیره بیا د کشمیر، هند او افغانستان په هکله د پوځ لخوا غوره کیږي.
د پاکستان د مشهور حقوق پوه او د عوامي نیشنیل پارټۍ د مرکزي شورا د غړي لطیف آفریدي په وینا، چې د ټیلیفون پرمټ یې تهران راډیو سره خبرې کولې، ترڅو چې په افغانستان کښې د پاکستان مداخله غواړی سیاست ختم نه شي تر هغه به طالبان او ترهګري له مینځه لاړ نشي.
اوس د دې سیاست او سټراټیجۍ د عملي کیدو لپاره که هرڅومره ملکي بې ګناه خلک او حتی ماشومان هم په وینو کښې لیت پيت شي نو خیر دی. د پاکستان د پخواني ولسمشر آصف علي زرداري په په وینا، کومه سټراتیجي چې د افریقې بوکوحرام ډله تعقیبوي همهغه د پاکستاني بوکوحرام یعنې طالبانو ډلې لخوا هم تعقیبیږي چې همهغه د اسلام او مسلمانانو بدنامول دي.