د پاکستان د خېبر پښتونخوا صوبې په مرکز پېښور کښې په يوې مدرسې يعنې اسکول باندې د دغه هېواد د طالبانو د ډلې حمله چې له کبله يې يو سل يو څلوېښت زده کوونکي ووژل شول له کورنيو، سيمه ايزو او نړيوالو غبرګونونو سره مخامخه شوې ده.
په دا ډول چې د پاکستان وزيراعظم محمد نواز شريف نن د ټولو ګوندونو د مشرانو په شتون سره غونډه جوړه کړه چې پکې د پېښور د دهشتګردانه حملې د څېړنې په ترڅ کښې له دا ډول واقعاتو سره د مقابلې او له تکرارېدو څخه د مخنيوي لپاره ضروري لارې چارې غوره کړي. د پاکستان حکومت د دغه لړزوونکي جنايت په مناسبت درې ورځې يعنې له نن نه د جُمعې تر ورځې پورې په دغه ټول هېواد کښې د عمومي و ير اعلان کړے دے.
د تحريک انصاف ګوند مشر عمران خان چې ګوند يې په خېبر پښتونخوا کښې د ائتلافي حکومت مشري لري د نواز شريف په مشرۍ د دغه هېواد د ګوندونو د مشرانو په غونډه کښې ګډون وکړ. هغۀ تقريباً پينځۀ مياشتې وشوې چې د دغه هېواد په پائېتخت اسلام اباد او په دې وروستيو کښې د پنجاب صوبې په مرکز لاهور کښې د حکومت په خلاف يو لړ پراخه احتجاجونه شروع کړي دي او همدا مسئله د دې سبب شوه چې د خپلو صوبائي چارو او د امنيت ټينګېدو ته له پاملرنې څخه پاتې شي. خو په دې حال سره عمران خان اعلان کړے دے چې په ټول هېواد کښې به د حکومت په خلاف مظاهرې د زوړند په حال کښې راولي.
د تحريک انصاف ګوند مشر د يوې بيانيې په خپرولو سره د دغه لړزوونکي جنايت په وړاندې د مختلفو ډلو د يووالي په ضرورت تاکيد وکړ او د پاکستان له مرکزي او ځاي حکومتونو او د دغه هېواد له فوځ څخه يې وغوښتل چې د دغه غېر انساني جنايت له عاملانو سره د مقابلې او د ترهه ګرۍ د جرړو د وېستلو لپاره له يو بل سره ملګرتيا وکړي.
د پاکستان د طالبانوډلې د زده کوونکو قتل عام په شمالي وزيرستان کښې د دغې ډلې په خلاف د پاکستان د فوځ د عملياتو غبرګون اعلان کړ. خو د پاکستان د دفاع وزير خواجه آصف وويل چې د پېښور په اسکول باندې د طالبانو د ډلې د دهشتګردانه حملې او د عامه خلقو د قتل عام باوجود پکار دي له دغې ډلې سره د اسلام اباد جنګ دوام پېدا کړي او په شاتګ ونۀ کړي.
په پېښور کښې دغه لړزوونکے جنايت د سيمې د هېوادونو او نړيوالو ټولنو له پراخې غندنې سره مخامخ شوے دے.
د ملګرو ملتو عمومي سېکتر بانکی مون د پاکستان په پېښور کښې په اسکول باندې دهشتګردانه حمله وغندله او هغه يې د هغو بې دفاع ماشومانوچې د تعليم په حال کښې وو يو وحشتناک اقدام وبالۀ.
د اروپا اتحاديې د بهرني سياست مشرې فېډريکا موګريني هم په يوې بيانيه کښې دغه حمله وغندله. چين، امريکې، هند، افغانستان او د ايران اسلامي جمهوريت د نورو هېوادونو په شمول د دغه لړزونکي جنايت په غندلو سره له ترهه ګرۍ سره په جدي مقابلې باندې تاکيد وکړ.
په اسکول کښې د ماشومانو قتل عام چې په هر عنوان سره شوے وي تر دومره اندازې لړزوونکے او شرمناک دے چې د افغانستان طالبانو ډلې هم د يوې لنډې بيانيې په صادرولو سره د پاکستان د پېښور ټرېجډي چې د پاکستان د طالبانو د ډلې لخوا ترسره شوه او پکې يو سل او يو څلوېښت کسان ووژل شول وغندله.