د امریکې یو سپین پوستي پولیس افسر د فلوریډا ایالت په اورلانډو ښار کښې یو تورپوستی سړی په ډزو ویشتی او سخت یې ژوبل کړ.
د پریس ټي وي د رپورټ له مخې عیني شاهدان وايي چې د رابرټ میک کارټي په نامه پولیسي افسر په ۲۸ کلن بې وسلې تورپوستی ځوان سِډریک بارټي باندې په داسې حال کښې ډزې وکړې چې هغه د تسلیمیدو په نښه خپل لاسونه اوچت کړي وو.
له دغې پیښې وروسته پولیسو په یوه خبرپاڼه کښې له خلکو وغوښتل چې په قضاوت کښې دې بیړه نه کوي او په غوسه کیږي دې نه بلکې د تحقیقاتو پایلې ته دې صبر وکړي.
په امریکا کښې د توکم پالنې په خلاف د مظاهرو نوی دور پس له دې پيل شو چې په میسوري ایالت کښې یوې محکمې د مایکل براون په نامه د یو تورپوستي ځلمې په قتل تورن سپین پوستی پولیس تبرئه او خوشی کړ.
همداشان په ایریزونا ایالت کښې هم د امریکې پولیسو د رومن بریزبون په نامه یو بې دفاع تورپوستی ځوان د نشه ایزو موادو د قاچاق په شک په ډزو سره وواژه.