د پاکستان پخوانيو لسمشر آصف علي زرداري د دغه هېواد د پيپلز پارټۍ مرستيال مشر په خپله غېر رسمي خبرو اترو کښې چې په لاهور ښار کښې د بلاول بوټو نومې کور کښې د خپل ګوند له مسئولينو سره يې لرلے وويل، په پاکستان کښې د اقتدار جنګ دے او اصل جنګ د اسټپلېشمنټ او منتخب حکومت ترمېنځ د اختياراتو په سر دے.
د پاکستان د پخواني ولسمشر د وېنا له مخې اسټېبلشمنټ چې په فوځ، استخباراتي ادارې آئي اېس آئي او بيوروکرېسۍ باندې مشتمل دے په زور سره غواړي له منتخب حکومت څخه اختيارات واخلي او که زۀ د خلقو د غوښتنې له مخې په دغه جنګ کښې ورګډ شوم نو په هغه صورت کښې به اسټېبلېشمنټ خپلو هدفونو ته ورسيږي. د زرداري مراد دا دے چې د پاکستان په هغه سياسي کړکېچ کښې چې له څو مياشتو راهسې د نواز شريف د حکومت په خلاف روان دے ورګډ نۀ شي او د نواز شريف له حکومت څخه ملاتړ وکړي او د پيپلز پارټۍ او نورو ګوندونو د ملاتړ په وجه دي چې اسټېبلېشمنټ تر اوسه د نواز شريف حکومت ختم نۀ کړې شو. دا په داسې حال کښې دي چې د زرداري د وېنا له مخې نواز شريف د هغه کړکېچ په وخت چې د اسټېبلېشمنټ لخوا د اصف علي زرداري د حکومت په خلاف د مېموګېټ په نامه جوړ شوے ؤ هغه درک نۀ کړ او د پيپلز پارټۍ د حکومت په خلاف يې له اسټېبلېشمنټ سره مل دريځ غوره کړ. نو ځکه هغه کار چې نواز شريف وکړ د زرداري په قول هغه داسې کار نۀ شي کولې. دپاکستان پخواني ولسمشر زياته کړه کله چې ما نعرې وهلې چې نواز شريف دې مخ په وړاندې ګام واخلي نو هغه موقع وه چې نواز شريف له خوبه راويښ شو. آصف علي زرداري همدارنګ څرګنده کړه چې اسټېبلېشمنټ د دۀ د حکومت په وخت کښې د دۀد اختياراتود کمولو لپاره هم جنګ وکړ او اوس هم هغه معامله له نواز شريف سره کوي. د پاکستان پخواني ولسمشر وويل چې بې له شکه د هېواد نظام يو لړ نيمګړتياوې لري او د دغو نيمګړتياو د لرې کولو لپاره يې کوشش کړے دے او په راتلونکو وختونو کښې به هم دغو کوششونو ته دوام ورکړي، خو د نظام د ختمولو لپراه کوششونه وشي نو په داسې صورت کښې به هم ورسره د مقابلې لپاره هغه او د هغۀ ګوند له هر چا مخکې وي. د زرداري څرګندونې له دې امله د غور او اهميت وړ دي چې يو عامه کس يا عامه سياستوال نۀ دي وړاندې کړې بلکې يو داسې کس وړواندې کړې دي چې د پاکستان ولسمشر ؤ او په ذمه وارۍ او هغو دقيقيو اطلاعاتو ته په توجه سره چې يې لري داسې خبرې کړې دي او همدارنګ د پاکستان يو ډېر لوے سياسي ګوند چې پيپلز پارټي ده د خپل زوے په ملګرتيا سره يې لارښونه او رهبري کوي. البته که بهر ته په تېره بيا امريکې ته د پاکستان د فوځي او سياسي چارواکو د سفرونو څېړنه وشي نو هم دا خبره په ډاګه کيږي چې د پاکستان په سياست کښې وړومۍ خبره د فوځ چليږي نۀ د سياستدانانو. مثلاً د پاکستان د فوځ ستر قوماندان جنرال راحيل شريف په هغه وروستي دوه هفته اي سفر کښې چې امريکې ته يې کړے ؤ د دغه هېواد له لوړرتبه سياسي او فوځي چارواکو لخوا يې تاود هرکلے وشو او په شمالي وزيرستان کښې د پاکستان د فوځ د عملياتو په خاطر چې د سږ کال د جون له پينځلسمې څخه شروع شوي دي په زياتو مډالونو او ډاليو سره ونازولے شو او په د اسې حال کښې چې د شمالي وزيرستان عيني شاهدان او باخبره سرچينې دغه عمليات له نمائشي عملياتو نه زيات څه نۀ بولي.
په هر حال امريکه د افغانستان، پاکستان او سيمې له سټراټيجکو مسائلو سره په رابطه کښې يوازې د پاکستان فوځ ته اهميت ورکوي او د دغه هېواد د منتخب حکومت ملاتړ تر دومره حده کوي چې خپلو خلقو او نړيوالو ته وښئ چې امريکه د ډېموکرېسۍ پلوي ده، البته د شنډې ډېموکرېسۍ.
بده به نۀ وي چې دلته د پاکستان د پخواني ولسمشر جنرال پروېز مشرف وروستيوڅرګندونو ته اشاره وشي چې ويلې دي د هېواد په چارو کښې د فوځ رول دې قانوني شي او په اساسي قانون کښې پکار دي لازمي وګرځي. د پاکستان د دغه پخواني ډېکټاټور د وېنا له مخې يوازې فوځ دے چې د هېواد د اقتصادو لپاره يې کار کړے دے او د پاکستان هغه سياستوالان چې واکمن جنرالان ډېکټاټوران بولي په اصل کښې دا خبره نۀ درک کوي چې دا فوځ دے چې هېواد يې له اقتصادي نظره ژغورلے دے. پروېز مشرف چې د کراچۍ په يو هوټل کښې په يو لړ مراسمو کښې يې وېنا کوله وويل چې د القاعده او طالبانو ډلې د امريکې د غلطو سياستونو په نتيجه کښې رامنځته شوې دي. البته دا خبره په کامله توګه صحيح ده چې د القاعدې او طالبانو ډلې امريکې جوړې کړې دي خو پوښتنه دا ده چې د القاعدې او طالبانو د ډلو په جوړولو کښې کومو کسانو او کوموهېوادونو له امريکې سره ملګرتيا کړې ده. نو په ځواب کښې بايد ووايو چې د پاکستان د پخوانۍ فقيدې وزيراعظمې او د پيپلز پارټۍ د مشرې مېرمن بې نظير بوټو څرګند اعتراف ته يوه اشاره وشي چې ويلي وو چې د طالبانو د ډلې په جوړولو کښې پاکستان يوازې نۀ ؤ بلکې د هغې په قول پاکستان د هغې طرحې او پلان اجرا کوونکے ؤ او پلانوونکي يې امريکه او برطانيه وو او سعودي عربستان هم له مالي نظره له دغې پروژې سره مرسته وکړه او د پاکستان د ځينو فوځي جنرالانوڅرګندونې هم په خپل ځاے دي چې ويل به يې او اوس هم وائي چې د طالبانو ډله د پاکستان يوه سټراټيجکه سرمايه ده چې د سياسي مسائلو د کارپېژاندو په قول له طالب عناصرو څخه په کشمير او افغانستان کښې د هند په مقابل کشې د وسلې په توګه استفاده کوي. البته پکار دي ووايو چې د پاکستان فوځ هم د پاکستان د اکثرو سياستوالو د فاسد والي په خاطر د دغه هېواد په سياسي چارو کښې مداخلت کوي او د پاکستان سياستوالان هم اکثر فئوډال دي. هغه سياستوالان چې د خلقو له متن څخه راپاڅېدلي وي ډېر کم دي.