د امريکې ولسمشر د دغه هېواد فوځيانو ته حکم ورکړ چې له 2014 کال نه وروسته دې په افغانستان کښې خپلو جنګي عملياتو ته دوام ورکړي.
د نيويارک ټائمز ورځپاڼې د ليکنې له مخې د باراک اوباما وروستے حکم په افغانستان کښې امريکائي ځواکونو ته دا اجازه ورکوي چې حتی له 2014 کاله وروسته هم چې په افغانستان کښې د هغوي جنګي رول ختميږي د يو بل کال لپاره هم کولې شي په جنګ کښې نېغ په نېغه ګډون ولري.
يو امريکائي چارواکي چې غواړي نوم يې په ډاګه نۀ شي د اېسوشي اېټډ پرېس خبريالانو ته وويل، د نويو احکامو له مخې د امريکې فوځ يوازې هغه وخت په افغانستان کښې د طالبانو د ډلې کسان د حملو هدف ګرځولې شي چې دغه کسان د امريکائي ځواکونو لپاره ګواښ وګڼلې شي يا هم نېغ په نېغه له القاعدې څخه ملاتړ وکړي، په داسې حال کښې چې د القاعدې ډلې په غړيو به په هر صورت کښې حملې کيږي.
د داسې تګلارې په غوره کولو سره د امريکې ولسمشر يو ځل بيا په افغانستان کښې د جنګ د ختمولو لپاره خپله ژمنه ماته کړه. اوباما د امريکې د 2008 کال د ولسمشرۍ د انتخاباتو د سيالۍ په دوران کښې لوظ وکړ چې که سپينې ماڼۍ ته لاړ نو په افغانستان او عراق کښې به د جارج ډبليو بوش له حکومته په وراثت کښې رسېدلي جنګونه ختم کړي. د عراق په اړه دغه وعده د څو کلونو لپاره پوره شوه، که څه هم څو مياشتې مخکې په عراق کښې د داعش ترهه ګرې ډلې قدرت موندنې امريکايانو ته يو فرصت په لاس ورکړ چې له دغې ډلې سره د مقابلې په بهانه يو ځل بيا عراق ته راستانۀ شي.
د افغانستان په اړه اوباما وعده وکړه چې د 2014 کال تر آخره پورې به امريکائي ځواکونه له دغه هېواده اوځي او د امريکې د تاريخ ترټولو اوږد جنګ به ختم شي. خو د وخت په تېرېدو سره د امريکې ولسمشر په افغانسان کښې د جنګ په اړه له خپلې وعدې څخه قدم په قدم وروستو شو. په ابتداء کښې وويل شول چې 2014 کال په افغانستان کښې د امريکې د فوځي عملياتو د ختمېدو وخت دے ، نه له دغه هېواده په کامله توګه دامريکائي ځواکونو د وتلو وخت. په بله معنا امريکايانو کوشش وکړ چې له افغان فوځيانو سره د مشاورتي مرستو کولو په بهانه په افغانستان کښې تر 2016کال پورې د خپلې موجودګۍ د دوام زمينه برابره کړي. خو له دې سره په افغانستان کښې د نهو زرو او اتو سوو امريکائي فوځيانو د شتون دوام بې له دې چې په جنګي عملياتو کښې ګډون ولري د امريکې د فوځي قوماندانانو هيلې يې نۀ پوره کولې. په همدې وجه ويل کيږي چې له تېرو څو مياشتو راهسې د امريکې فوځي قوماندانانو په سپينه ماڼۍ باندې دباوونه زيات کړل چې د امريکې د وسله والو ځواکونو د عمومي قوماندان په توګه له باراک اوباما څخه په جنګي عملياتو کښې د ګډون اجازت ليک ترلاسه کړي. په عراق کښې د څو وروستيو مياشتو پېښو او په افغانستان کښې د تندلارو او ترهه ګرو ډلو د قدرت ښودلو د تکرار احتمال هم له امريکائي جنرالانو سره مرسته وکړه چې اوباما نوې فېصلې غوره کولو ته راضي کړي.
اوس او د امريکې د ولسمشر په وروستي حکم سره په افغانستان کښې به د امريکائي عسکرو جنګي وظيفه دوام ومومي. البته د تېرې لسيزې د وروستيو کلونو په اپوټه په افغانستان کښې د امريکائي عسکرو شمېر به نور څه د پاسه يولک نۀ وي. خو د القاعدې او طالبانو له ډلې سره په جنګ کښې د تقريباً لسو زرو فوځيانو ګډون به هم هغه شان امريکائي ځوانان د مرګ خولې ته وليږي او د امريکې په ټېکس ورکوونکو به لا زيات درانۀ لګښتونه وتپل شي. دا ټکے له دې امله اهميت لري چې د امريکې عمومي فوځي انډيوالانو وويل چې د 2015 کال له شروع څخه به په افغانستان کښې فوځي ځواکونه ونۀ لري. په بله معنا له القاعدې ډلې سره د جنګ يا د طالبانو د ډلې د حملو د شنډولو دنده به يوازې د امريکې په غاړه وي.
له دې امله چې د تندلارو ډلو د ماهيت په پېژندلو کښې د لويديځ د تېروتنو په دليل د مينځني ختيځ د بدلونونو کلي چلند د دغو ډلو وده ده داسې ښکاري چې امريکائي ځواکونه به له 2014 نه تر 2016 کلونو په دوران کښې او له هغو وروسته له لا سختو او مشکلو حالاتو سره مخامخ شي.