د صهيونېسټ رژيم فوځ  د غزې په تړانګه باندې له زمکې او هوا څخه څو ځله درنې حملې وکړې.
د صهيونېسټ رژيم جنګي الوتکو بېګا د غزې د تړانګې له شمال نه تر جنوبه پورې په نهويشتو ځايونو بمونه اورول.
په همدې حال کښې د صهيونېسټ رژيم توپونو او ټېنکونو هم د غزې د تړانګې مختلفې سيمې د خپلو حملو هدف وګرځولې.
د غزې د تړانګې په جنوب باندې د  صهيونېسټ رژيم د وړمې ورځې په هوائي حمله کښې هم درې فلسطينيان شهيدان شوي وو.
فلسطيني مبارزانو د صهيونېسټ رژيم د جنايتونو په ځواب کښې د فلسطين په نيواکي زمکو کښې د دغه رژيم په سنګرونو باندې يو سل او درې توغندي او هاونونه اورول.
د فلسطين د اسلامي جهاد عمومي سېکتر رمضان محمد شلح په دې باندې په تاکيد سره چې د صهيونېسټ رژيم حملې به بې ځوابه پرې نږدوو وويل: د صهيونېسټ رژيم په سنګرونو د فلسطيني مبارزانو توغنده اي حملې د غزې په تړانګه باندې د دغه رژيم د حملو په ځواب کښې دي.
په غزې باندې د اسرائيلو له نويو حملو وروسته د صهيونېسټ رژيم د بهرنيو چار وزير اويګډور لېبرمېن د اسرائيلي ځواکونو لخوا د غزې د تړانګې د بيا نيولو غوښتونکے شو.
دا په داسې حال کښې دي چې د صهيونېسټ رژيم وزيراعظم بنيامين نتانياهو هم په غزې باندې د حملو په دوام تاکيد کړے دے.
په دې وروستيو ورځو کښې د غزې په خلاف د صهيونېسټ رژيم د چارواکو مخ په زياتېدو ګواښونو چې په دغه سيمه باندې د دغه رژيم له سختو حملو وروسته بڼه نيسي په فلسطيني سيمو باندې له حملو څخه د دغه غاصب رژيم هدفونه له مخکې نه زيات په ډاګه کړي دي.
په غزې باندې دصهيونېسټ رژيم نوي تېري د دې ښودنه کوي چې د دغه رژيم له تشدد نه ډک ماهيت بشري ضده دے او د دې بيانوونکے دے چې دغه رژيم په سيمه په تېره بيا په فلسطيني سيمو کښې د پراختيا غوښتونکو او سلطه لټوونکو طمو په مخ بيائلو لپاره د فرصت په لټه کښې دے.
په مېنځني ختيځ کښې د ساز باز د چلند له نوي دوره وروسته په غزې باندې د صهيونېسټ رژيم د حملوسختېدنې او د فلسطينيانو په خلاف د دغه رژيم د جنايتونو زياتېدنې له مخکې نه زيات دغه حقيقت په ډاګه کړے دے چې د ساز باز چلند د صهيونېسټ رژيم د جنايتونو له زياتېدو نه پرته بله نتيجه نۀ لري.
په حقيقت کښې د سازباز خبرې اترې د صهيونېسټ رژيم لپاره د خپلو جنګ جوړوونکو او پراختيا غوښتونکو سياستونو د تعقيبولو لپاره د يو فرصت په توګه  ګڼل کيږي او دغې موضوع په مېنځني ختيځ کښې د ساز باز د ناوړو پائېلوموضوع له مخکې نه زياته څرګنده کړې ده.
دا په داسې حالاتو کښې  دي چې صهيونېسټ رژيم له نړيوالوبدلونونو څخه هم په ناوړې استفادې سره د فلسطيني اولس په خلاف خپل جنايتونه زيات کړي دي چې دغه جنايتونه د عامه افکارو له غبرګون سره کم مخامخ شي.
په غزې باندې د صهيونېسټ رژيم د حملو سختېدنه په داسې حالاتو کښې چې عامه افکار د يوکرائن د بحران او د هغۀ د سياسي بدلونونو لوري ته متوجه شوي دي په دې چوکاټ کښې جاجول کېدې شي.
بې له شکه د صهيونېسټ رژيم په وړاندې د نړيولې ټولنې سستي او له دغه رژيم څخه د لويديځ هر اړخيز ملاتړونه چې په غزې باندې د حملو د زياتولو لپاره د شنۀ څراغ په څېر ګڼل کيږي هم د صهيونېسټ رژيم د جنايتونو په دوام کښې مهم رول لري.
امريکې ته د بنيامين نتانياهو له سفره او له هغۀ څخه د امريکائي چاروکو له تاود هرکلي وروسته د صهيونېسټ رژيم د جنګ جوړونې نوے دور او نيواکي فلسطين ته د برطانيې د وزيراعم ډېوېډ کامرون له سفر او له اسرائيلو چارواکو سره د هغۀ له ليدنې کتنې سره په يووخت په غزې باندې د صهيونېسټ رژيم د تېريو زياتېدنه د صهيونېسټ رژيم او د هغۀ د ملاتړو د يو ډول غږملتيا بيانوونکې ده.
خو په داسې حالاتو کښې د غور وړ ټکے د صهيونېسټ رژيم حملو ته د فلسطيني مقاومت پرېکنده ځواب دے چې اسرائيليان يې سخت اندېښمن کړي دي او دا موضوع د دې سبب شوې ده چې د اسرائيلو عمومي افکار له اور سره د اسرائيلي چارواکو د لوبولوکولوپه حقله خبردارے ورکړي.
په دې زمينه کښې د صهيونېسټ رژيم د جنګ پخواني وزير عمېر پرتز د هغه څه په  اړه چې هغۀ د غزې په جبه کښې د اسرائيلو ګېرېدل ونومول خبردارے ورکړ.