وی مجتهد  عالم او عارف حضرت آيت الله العظمى حاج شيخ محمد تقى بهجت فومنى    د قم له مشهورو فقهاوو څخه  ګڼل کیده چې  د قم په  علمیه حوزې  کې یې په فقې کې  د عالي دورې درسونه ښودل .  هغوي په زهد او معنويت کښې ډېر مشهور وو او د دې زمانې په لویو عارفانو کې حسابیده.
ایت الله بهجت د 1334هجري قمري (۱۲۹۴ لمریز )کال په اخر کښې د  ایران د ګیلان ولایت په  فومن ښار کښې وزيږيد.
د هغوي پلار کربلايي محمود بهجت   د هغه  ځاي له اعتماد وړو کسانو څخه ګڼل کيدۀ.  ایت الله بهجت لومړۍ زده کړې  د فومن په مکتب خانې (ښوونځي) کښې تر سره کړې. او په فومن ښار کښې يې په 1348 هجري کښې په ديني   زده کړو  پیل وکړ.  د ادبياتو له زده کړې وروسته د قم په لور  روان شو او هلته  له لږو ايساريدو وروسته کربلاي معلی ته لاړ او د اخوند خراساني  د يو شاګرد په درس کښې يې شرکت وکړ او د لويو مجتهدانو حاج آقا ضياء عراقى او ميرزاى نائينى په درسونو کښې له شرکته وروسته يې د ايت الله حاج شيخ محمد غروي اصفهاني (کمپاني) په درس  کښې ګډون وکړ.
همدارنګ يې د ايت الله العظمی حاج سيد ابوالحسن اصفهاني او حاج شيخ محمد کاظم شيرازي له درسونو  یې زياته ګټه واخسته او د فقه او اصول نه پرته يې د مرحوم سيد حسين بادکوبه په نږد د ابن سينا ( بو علي سینا)د اشارات کتاب او د ملاصدرا کتاب اسفار ولوسته.
په 1364قمري کال کښې ايران ته راستون شو او په قم کښې يې له  آيت اللّه العظمـى كوه كمرى څخه زده کړه وکړه  او د حضرت آيت اللّه العظمى بروجردى د فقې او اصولو په درسونو کښې يې ګډون وکړ.
هغوي له 50 کاله زیات عمر    په خارج فقه او اصول درسونه د قم په علمیه حوزې کې وښودل او ډیر شاګردان یې لرل .دوی له شهرت او نومه تښتیدل او له دې امله یې ډیر درسونه په خپل کور کې ښودل .او همداراز د دوی  درسي ټولګې د قم  په ګذر خان کې په فاطمیه جومات کې هم ترسره کیدې.   د قم ډیر نوم وتي عالمان د هغوی شاګردان پاتې شوې دي   چې ځینې یې مجتهدان او د رسالې خاوندان دي .  په هغوی کې د ایت الله مصباح یزدي په شان کسانو ته اشاره کولی شو.
دوی تر ډیره حده هڅه کوله ځان له مرجعیته  لیرې وساتي  خو  اخر   د ځینو عالمانو او مجتهدانو په ډیر ټینګار سره تیار شو چې د دوی عملیه رساله ولیکل شي او دمرجع په توګه اعلان شي خو بیا  به یې هم په کتاب د خپل نوم له لیکلو ډډه کوله. دوي په فقې او اصولو کې ډیر کتابونه لري چې په خپله یې دهغو د چاپ لپاره اقدام ونه کړ خو  د دوي دشاګردانو په کوشش سره یې ځینې کتابونه چاپ شوې دي .
حضرت ایت الله بهجت   دتعلیم په څنګ کې  د نفس پاکۍ او د معنوي کمالاتو بشپړتیا ته  هم مخه کړه  په اولس اتلس کلنۍ کې د  سید علی قاضی په اخلاقي عرفاني شاګردانو کې شامل شو .او په دې برخه کې یې ډیر پرمختګ وکړ. او دهمدغه نفس د پاکۍ او د عرفان له امله  یې  د خلکو په زړونو کې  لوی ځای درلود.
ایت الله بهجت د  ۱۳۸۸کال د غویي په اوه ویشتمه   د زړه د  دریدو له  امله  وفات شو او په قم کې د بي بي معصومې په  زیارت کې خاورو ته وسپارل شو.