ڈاکٹر منظور اعجاز

امریکی حکومت تے جنگ وچ کُدن لئی بہانے لبھ رہی ہے تے کیمیائی پتھیاراں دے ڈھکوسلے بنا رہی ہے پر کیاں تنظیماں تے وڈھے اخباراں دے سرویاں نے ایہہ دسیا ہے جو لگ بھگ سٹھ فیصدی امریکی جنگ دے خلاف ہین تے صرف انتی فیصد جنگ دے حق وچ ہین۔ ایہہ امریکی لوکاں دی جنگ دی مخالفت ہی ہے جیس پاروں کانگرس دے بہتے ممبر حملے دے خلاف ہین تے صدر اوبامہ کانگرس کولوں شام تے حملے دی منظوری نہیں لے سکے۔ پر پینٹاگون تے سٹیٹ ڈیپارٹمنٹ (وزارت خارجہ) دن رات جنگ دی تیاریاں وچ لگے ہوئے ہین۔ ایس توں پتہ لگدا ہے جو کیویں ملٹری انڈسٹریل کمپلکس حکومت نوں جنگ ول دھک رہیا ہے تے کیویں لوکائی تے جمہوریت دا ناس ماریا جا رہیا ہے۔
امریکی لوکاں وچ جنگ دی مخالفت دی وڈھی وجہ ایہہ ہے جو اوہناں نوں عراق تے حملے دے جو کارن دسے گئے سن اوہ جھوٹ ثابت ہوئے۔ عراق تے حملہ کرن لئی حکومت نے لوکاں نوں یقین دوایا سی جو اوس ملک کول ایٹمی ہتھیار ہین تے ایس لئی اوہناں نوں مکاون لئی حملہ ضروری ہے۔ حملہ ہوون توں مگروں ایہہ سب تے چانن ہو گیا جو عراق کول ایٹمی اسلحہ ہوون بارے کھلا جھوٹ بولیا گیا سی۔ ہُن جدوں صدر اوبامہ تے وزیر خارجہ جان کیری شام کول کیمیائی ہتھیاراں ہوون دی گل کردے ہین تے لوکاں نوں یقین نہیں آوندا۔ کیمائی ہتھیار ورتن دیاں جیہڑیاں شہادتاں دتیاں جا رہیاں ہین اوہناں بارے وی شک ہے جو ہو سکدا ہے کہ ایہہ ہتھیار شام دے باغیاں نے ورتے ہوون۔
امریکہ دی کانگرس وچ جنگ مخالفاں دا وی عجب اکٹھ ہے۔ ایس اکٹھ وچ ات پچھونہے تے ات اگونہے دھڑے رلتی ہین۔ ات پچھونہے دھڑے کہندے ہین جو امریکہ نے دنیا نوں سدھا کرن دا ٹھیکہ نہیں لیا ہویا۔ اوہ کہندے ہین جو جے کسے ملک وچ خانہ جنگی ہو رہی ہے تے اوہ ملک نبھڑے یا پھیر باقی دنیا مل کے اوس مسئلے نوں حل کرے۔ اوہناں دا کہنا ہے جو امریکہ ایس پھڈے وچ اپنے معاشی وسیلے کیوں برباد کرے۔ امریکہ پہلاں ہی قرضیاں دے بھار تھلے رگڑے کھا رہیا ہے تے اک ہور جنگ ایس قرضے وچ وادھا ہی کرے گی۔ ایہہ پچھونہا دھڑا امریکہ نوں جگت جھیڑیاں توں باہر کڈھ کے وکھرا رہن دی صلاح دیندا ہے۔ اہناں دے الٹ کھبی پکھ دے ڈیموکریٹ جنگ نوں انسانی حقاں دا ویری سمجھدے تے ایس دی مخالفت کردے ہین۔ ایہہ دوہیں دھراں امریکہ دیاں گھروکی پالیسیاں تے اکدوجے دیاں ات ویری ہین پر اہناں شام دے حملے دے خلاف ایکتا کیتی ہوئی ہے۔ ایسے کارن اجے تیکر شام تے حملہ رُکیا ہویا ہے۔

عام امریکی تے جنگ توں اکیا ہویا ہے پر امریکہ دے ملٹری انڈسٹریل کمپلکس دی لوڑ ہے جو نت کوئی جنگ ہوندی رہوے۔ ملٹری انڈسٹریل کمپلکس وچ اسلحہ بناون والے تے اوہناں دیاں پالیاں ہویاں لابیاں ہین۔ امریکہ وچ اسلحہ بناون دی بہتی ہی وڈھی صنعت ہے جیس دا کاروبار ہی اوس ویلے چل سکدا ہے جدوں اسلحہ ورتیا جاندا رہوے تے اوہناں دیاں ملاں نوں نواں اسلحہ بناون دے آرڈر ملدے رہن۔ اسحہ بناون والی انڈسٹری امریکہ دے فوجی تے سول لیڈراں نوں پٹو پاون لئی کئی سوبلین ڈالر لابئنگ تے خرچ کردی ہے ، ریٹائرڈ فوجیاں تے گذریل لیڈراں نوں مال کھوا کے جنگ دی راہ پدھری کرواندی ہے۔ ایہہ نویں اسلحے دے ٹیسٹ لئی وی جنگاں کرواندی ہے تے جدوں کوئی ہتھیار بڑا کارگر ثابت ہو جاوے تے اوس دی دنیا وچ بلے بلے وی ہوندی ہے تے اوس دے نویں خریدار وی پیدا ہوندے ہین۔ افغانستان دی جنگ وچ ڈرون جہازاں دے مارو ہوون نال اوس دی دنیا وچ طلب تے وکری ودھ گئی ہے۔

امریکہ وچ ملٹری انڈسٹریل کمپلکس دوجی وڈھی جنگ تائیں اپنا کھلارا کھلار چکیا سی۔ ایسے نوں مُکھ رکھدیاں امریکہ دے اوس ویلے دے صدر آئزن ہاور نے وارننگ دتّی سی جو جے ایہہ ملٹری انڈسٹریل کمپلکس انج ہی ودھدا رہیا تے امریکہ وچ اینویں ناں دی جمہوریت رہ جاوے گی۔ لوک عراق جنگ دے حق وچ نہیں سن پر ملٹری انڈسٹریل کمپلکس دے گھیرے وچ آئے صدر بش تے اوہناں دے سنگیاں نے عراق تے حملہ کیتا جیس وچ لکھاں بندے مارے گئے تے اجے تیکر مردے جا رہے ہین۔ ہُن شام دے حملے دے وی لوکیں مخالف ہین پر تاریخ دسدی ہے جو ہوندا اوہو ہےجو ملٹری انڈسٹریل کمپلکس چاہندا ہے۔ ایس جنگی صنعت دیاں اپنیاں لوڑاں ہین تے اوس کتے نہ کتے جنگ چھیڑی رکھنی ہے۔ اول تے شام تے ہی حملہ ہووے گا نہیں تے پھیر کتے ہور جنگ دی تھاں لبھ لئی جاوے گی۔