رهبر انقلاب آیت اللہ علی خامنہ ای نے امریکی ریاست میساچوسیٹس دی راجدھانی بوسٹن وچ میرا تھن ریس وچ ہوئے دھماکیاں دی مذمت کردیاں ہویاں امریکہ نُوں دہشت گردی دے خلاف دوہری پالیسی اُتے تنقید دا نشانہ وی بنایا۔ اِک بیان وچ خامنہ ای نے کہیا کہ ایران دنیا دے کِسے وی خطے وچ ہون والی دہشتگردی دے خلاف اے تے ایہدی سختی نال مذمت کردا اے۔ اوہناں نے کہیا کہ ایہدے اُلٹ امریکہ جیہڑا انسانی حقاں دا علمبردار بندا اے ہمیشہ توں دہشتگردی دے خلاف دوہری پالیسی اختیار کر رکھی اے۔ خامنہ ای نے کہیا کہ امریکہ پاکستان‘ افغانستان‘ عراق تے شام وچ دہشت گردی دیاں کارروائیاں اُتے خاموش رہندا اے تے جدوں اپنے ملک وچ کجھ ہوندا اے تے اوہدے اُتے واویلا مچا دیندا اے۔ یاد رہوے کہ پچھلے دیہاڑ ایران دے وزارت خارجہ دے ترجمان نے بوسٹن میراتھن وچ ہوئے دھماکیاں نُوں امریکہ لئی دُکھ دی گھڑی قرار دِتا سی‘ پیر نُوں بوسٹن وچ ہوئے دھماکیاں وچ 3 بندے ہلاک تے 170 توں ودھ زخمی ہو گئے سن۔