جواب:

اس سوال دی وضاحت  اسراں  وے کہ  اج کل بوت سرے فرقے وُن کوی آپڑے آپ نوں شیعہ کہندا وے تے کوی کوئی سُنی تے وت سُنیاں وچ بی کوئ حنفی وے تے کوی مالکی تے کوی حنبلی  تے کوی شافعی   تے میرے تے میرے جئے ہور بوت سارے جواناں دے ذہن وچ اے سوال پیدا ہوندا وے کہ  آج اے سارے آپڑے آپ نوں حق کہندے وُن  تے دوسرے نوں باطل تے غلط  تے اناں بہانےآں نال ای معاشرے اچ نفرتاں پھیلانندے پے وُن ۔ تا سوال اے وے کہ اناں چو کیڑا مذہب ایجیا وے کہ جیڑا رسول اللہ صلی اللہ علیہ وآلہ وسلم دے زمانے وچ بی موجود ہئیا ؟ آیا اے سارے بعد وچ پیدا ہوین یا سارے رسول اللہ صلی اللہ علیہ وآلہ وسلم  دے زمانے وچ  موجود ہئے ؟
 اس سوال دا جواب  اے وے کہ  اسی اے دیکھئے ایں کہ کیڑا مذہب کس نال منسوب اے  ۔ تے اُس امام دی  تاریخ پیدائش کیہ وے ؟
۱-حنفی مذہب : امام ابوحنیفہ  نعمان بن ثابت  دے نال منسوب اے ۔ امام ابوحنیفہ  سنہ ۸۰ھ    اچ پیدا ہوے وُن تے سنہ ۱۵۰ھ  وچ اناں نے وفات پائی اے ؟
۲-مالکی مذہب : امام مالک بن انس اصبحی مدنی   نال منسوب اے  امام مالک دی تاریخ پیدائش ۹۵ ھ تے تاریخ وفات ۱۷۹ھ   اے ۔
۳-شافعی مذہب : امام محمدبن ادریس  نال منسوب اے  ۔ امام شافعی  دی تاریخ پیدائش  سنہ ۱۵۰ ھ  اے تے اناں دی تاریخ وفات سنہ ۲۰۴ھ اے ۔
۴-حنبلی مذہب : امام احمد بن حنبل  نال منسوب اے ۔ امام احمد بن حنبل دی تاریخ پیدائش ا۶۴ھ  اے تے تاریخ وفات سنہ ۲۴۱ھ اے ۔
۵-شیعہ مذہب : حضرت علی  علیہ السلام  ابن ابیطالب نال منسوب اے ۔ حضرت امام علی علیہ السلام دی تاریخ پیدائش ۱۳ رجب المرجب سنہ ۳۰ عام الفیل اے ۔
     اگور اس نوں ویکھا جاوے تے ذرا  جا سوچا جاوے تا پتہ چلدا وے کہ    حضرت علی علیہ السلام دے علاوہ باقی سارے  امام رسول اللہ صلی اللہ علیہ وآلہ وسلم دے زمانے وچ نئیں ہئے ۔ہک علی علیہ السلام ہی  وُن کے جناں نے آپڑی ساری زندگی    حضور سرور کائنات حضرت محمد صلی اللہ علیہ وآلہ وسلم دے نال گذاری اے ۔  لہذا شیعہ جیڑے مذہب نال اپنوں منسوب سمجھ دے وُن  او رسول اللہ صلی اللہ علیہ وآلہ وسلم دے زمانے وچ ہو سکداوے ۔ برے سوال اے پیدا ہونداوے کہ   آیا اس گہل دی تصدیق کسی قرآنی آیت  یا حدیث سی بی ہوندی اے کہ نا؟
اے شیعاں نے آپڑے کولو ای بنڑا لیتی اے ؟
قرآنی مذہب
إِنَّ الَّذِينَ آمَنُوا وَ عَمِلُوا الصَّالِحاتِ أُولئِكَ هُمْ خَيْرُ الْبَرِيَّة
یعنی بے شک جینالوکاں ایمان آندا وے تے اچھے عمل کیتے نے  او   خیر البریہ وُن ۔
اس  آیت وچ ہک خاص   مومناں دے گروہ دا ذکر اے کہ جناں نوں خیر البریہ کیا جانداوے ۔ ہونڑ ویکھنڑا  اے وے کہ اے کیڑا گروہ وے  ؟
۵ وی صدی ہجری دے ہک مشہور اہل سنت عالم  حاکم نیشابوری  نے آپڑی مشہور تے معروف کتاب  '' شواہد التنزیل'' وچ  مختلف سنداں نال  بیس  حدیثاں سی بی زیادہ حدیثاں نقل کیتاں وُن  کہ جناں وچ خیر البریہ سی مراد '' علی علیہ السلام  تے اُناں دے شیعہ وُن ۔  اسی اتھے اُناں  کچھ حدیثاں   بیان کرنے آں :
1)    ابن عباس سی روایت اے کہ جیڑے ویلے  اے آیت  نازل ہوئ اے تا نبی اکرم صلی اللہ علیہ وآلہ وسلم نے  حضرت علی علیہ السلام نوں فرمایا اے : ھو انت  وشیعتک تأتی انت و شیعتک یوم القیامه راضیین مرضیین ویأتی عدوک غضباناً مقمحین
ترجمہ:
یعنی اس سی مراد تُو تے تیرے شیعہ وُن ۔تو تے تیرے شیعہ قیامت ولے دِن  اجئ حالت وچ آسون کہ اللہ تواڈے سی راضی ہوسی تے  تُسی اللہ سی راضی ہوسو ۔تے تواڈے دُشمنڑ  غصے دی حالت وچ آسون تے دوزخ دے قہر تے غضب وچ مبتلا ہو جاسُن ۔
2)    ابوبرہ سی روایت اے کہ   جیڑے ویلے نبی اکرم صلی اللہ علیہ وآلہ وسلم نے  اس آیت دی تلاوت کیتی اے تا فرمایا نے :
هم انت وشیعتک یاعلی، و میعاد مابینی و بینک الحوض
یعنی خیرالبریہ سی مراد تو تے تیرے شیعہ وُن اے علی ، تواڈا تے میرا وعدہ حوض کوثر اے ۔
3)    اسراں ای  اہل سنت دے ہک ہور عالم دین  جلال الدین سیوطی بی آپڑی مشہور ومعروف تفسیر " الدرالمنثور" وچ  ابن عباس سی اے حدیث نقل کردے وُن کہ  جیڑے ویلے اے آیت نازل ہوئ اے تا نبی اکرم صلی اللہ علیہ وآلہ وسلم نے  حضرت علی علیہ السلام نوں فرمایا وے کہ : ھو انت و شیعتک یوم القیامه راضیین مرضیین
یعنی اس سی مراد تُو تے تیرے شیعہ وُن ۔تو تے تیرے شیعہ قیامت ولے دِن  اجئ حالت وچ آسون کہ اللہ تواڈے سی راضی ہوسی تے  تُسی اللہ سی راضی ہوسو۔
اس سی علاوہ بی بوت سارے دوجے عالماں نے بی آپڑی آپڑی کتاباں وچ اے حدیث لکھی اے کہ خیر البریہ سی مراد حضرت علی علیہ السلام تے  اُناں دے شیعہ وُن ۔
اس سی پتہ چلدا وے کہ صرف اور صرف شیعہ ای او مذہب اے کہ  جیڑا علی علیہ السلام نال منسوب اے تے اناں نوں اے نسبت  حضور اکرم صلی اللہ علیہ وآلہ وسلم نے عطا فرمائی اے ۔ لہذا علی السلام دے چانڑے ولے حضور صلی اللہ علیہ وآلہ وسلم دی زبانی شیعہ وُن  تے قرآن وچ اناں نوں  ای  خیر البریہ کیا گیا وے ۔