مریکہ دا شام نال ویر (۱

ڈاکٹر منظور اعجاز
امریکہ دے صدر باراک اوبامہ کانگرس وچوں شام تے حملے دی منظوری لین دی کوشش کر رہے سن۔ جد ایس وچ بہت اوکھت آگئی تے اوہناں اسرائیل دے صدر نیتن یاہو نوں فون کیتا جو امریکہ وچ یہودیاں دی سب توں وڈھی لابی، اے پیک ، نوں فون کرن جو اوہ امریکی کانگرس میناں نوں مناون۔ اسرائیل دے وزیر اعظم نیتن یاہونے اے پیک نوں فون کیتا تے اوس نے کانگرس وچ لابی کیتی۔ ایس توں ایہہ گل صاف ہو جاندی ہے جو مشرق وسطی وچ امریکہ دیاں چوکھیاں پالیسیاں دا مقصد اسرائیل دی رکھیا کرنا تے اوسدے آلے دوالے ملکاں نوں بھڑتھو وچ رکھنا ہے۔
امریکہ نے عراق تے دھاوا کرکے اوسدا لک پہلاں ہی توڑ دتا ہویا ہے۔ اوتھے ہُن اک طرحاں دی چالو خانہ جنگی ہو رہی ہے جیس وچ ہر روز درجناں بندے مردے ہین۔ ایسے طرحاں مصر وچ امریکہ نے صدر مرسی دے خلاف فوج دا کودتا کرواکے خانہ جنگی دا مڈھ بنھ دتا ہے۔ شام وچ وی اوہ نابرا
(باغیاں) نوں اعلانیہ اسلحہ دے رہیا ہے ۔ شام دی خانہ جنگی وچ ہُن تیکر اک لکھ لوک مر چکے ہین تے اجے ہور پتہ نہیں کنے مرنے ہین۔

امریکہ اسرائیل دی رکھیا لئی شام نوں ہھتیاراں توں وانجا کرنا چاہندا ہے۔ اوس دی پالیسی ہے جو شام ہر طرحاں دے اسلحے توں ہتھل ہو جاوے تاں جو اوہ کدی وی اسرائیل لئی کوئی مسئلہ نہ بنا سکے۔ اوس دا شام تے باغیاں دے خلاف کیمیائی ہتھیار ورتن دا الزام اک بہانہ سی حملہ کرن دا۔ پر امریکی کانگرس وچ ایس دی بڑی مخالفت ودھ گئی تے نال ہی روس نے کہیا جو اوہ شام کول موجود کیمیائی ہتھیار اقوام متحدہ دے حوالے کرن نوں تیار ہے۔ امریکیاں ایس گل نوں وقتی طور تے من لیا ہے پر ایہہ نہیں کہیا جا سکدا کہ اوہ شام تے حملہ کرن دا کوئی ہور بہانہ نہیں لبھے گا۔

ایہہ گل ویکھن نوں عجیب لگدی ہے جو شام وچ امریکہ دی اوہو پالیسی ہے جو القاعدہ تے دوجے اسلامی جہادیاں دی ہے۔ ایس توں ایہہ گل تے نتر کے
سامنے آوندی ہے جو امریکہ یا باغیاں دے حمائتی سعودی عرب تے خلیجی ریاستاں دے شاہاں دا مقصد شام وچ جمہوریت لیاونا نہیں سگوں شام نوں جڑاں تو ہلا کے ہتھل کرنا ہے۔ جے امریکہ دا مقصد مشرق وسطی وچ جمہوریت لیاونا ہووے تے اوس دے بانہ بیلی بادشاہ تے شیخ نہ ہوون۔ امریکہ سعودی عرب تے خلیجی ریاستاں وچ جمہوریت تے انسانی حقاں دی گل کیوں نہیں کردا؟کیوں جو ایہہ سارے ملک اوہدی مٹھ وچ ہین تے اوس دی مسلمان ملکاںوچ (پاکستان سنے) پالیسی لاون لئی ورتے جاندے ہین۔
ایس دے الٹ امریکہ ایران تے لبنان دی حزب اللہ دا ایس لئی ورودھی ہے جو ایہہ اسرائیل دی رکھیا دے فرمے وچ فٹ نہیں ہوندے۔ حزب اللہ تےاخیری جنگ وچ اسرائیل نال کافی بھیڑی وی کر چکیا ہے۔شام دے نال ویر دی اک وجہ شام دا حزب اللہ دی حمایت وی ہے۔ حزب اللہ وی شیعہ تنظیم ہے تے شام دی حکومت وی علوی شیعاں دی ہے۔سعودی عرب تے خلیجی ریاستاں دی وہابی سنی حکومتاں شام وچ جنگ نوں فرقو بنا رہیاں ہین۔ پاکستان تے افغانستان توں شیعہ ورودھی القاعدہ تے ہور جہادی فرقو جنگ لڑن لئی وی شام جا رہے ہین۔ ایہہ گل امریکہ نوں وی وارا کھاندی ہے کیوں اوس دا مڈھلا مقصد شام نوں ہتھل تے ویران کرنا ہے بھاویں اوہدے لئی اوس نوں اپنے وڈھے دشمناں نال وی ہتھ جوڑی کرنی پوے۔