Kutchula  madandaulo  akuphedwa  kwa  Ali Asghar (mwana wa Imam  Husain(a)) pa karbala.
Monga  tikudziwa  kuti  mwezi  wa Muharram  umenewu  ndi  mwezi  omwe  nkhani  yodandaulitsa  ndi  kumvetsa  chisoni  idachitika  pa karbala  komwe  kuli  kuphedwa kwa  Imam  Husain(a)  ndi  ana  ake  komanso  abale  ake,  mmodzi   mwa  ana  omwe  adaphedwa  pamalowa ndi  Ali Asghar  yemwe  adali  mwana  wachichepere  komanso  oyamwa. 
Pano  tikufuna  kulongosola  zina  mwa  zinthu  zomwe  zidamuchitikira  mwana  ameneyu  komwe  kuli  kudandaula  ndi  imfa  yomvetsa  chisoni  imeneyi.
Inde  zoona  kuti  mwana  ameneyu  adali  wachichepere  koma  tikaganizira  kwambiri  tipeza  kuti  mwanayu  adali  mmodzi  mwa  othandiza  Husain(a)   chifukwa  choti  kuphedwa  kwa  mwanayu  kukuonetsera  poyera  kupanda  chilungamo, chisoni,kusalungama  ndi kupondereza  kwa  anthu  amenewa. Izi   zikupereka  umboni  okwana  kuti  Imam  Husain(a)  adaphedwa  moponderezedwa.Kusonyeza  kuti  imfa  yamwanayu  idatsekula  thumba  lalikulu  lakupanda  umunthu  ndi chipembedzo  kwa   anthu  ngati  amenewa.
 
Ayatullah  Haqi  Chenasi  adanena  kuti  muyenera  kukumbukira  ndikutchula  madandaulo  akuphedwa  kwa  Ali Asghar  chifukwa  ndi  momwe  kuphedwa  koponderezedwa  kwa  Husain  kukudziwika.
Ngati  mukufuna  kumukumbukira  Imam  Husain(a)  muyeneranso  kulakalaka  kutchula  mavuto  a Ali  Asghar  kuti  kukumbukira  kwanu  kukhale  kokwanira.
Tsiku  lina  Imam  Sajjad(a)  adamufunsa  Minhar  (nthawi  yomwe  Mukhtar  Thaqafi adaukira  anthu opha  Husain(a) )kuti  kodi  nkhani  ya  Harimalah  ikuti  bwanji?  Minhar  adadabwa  nati  e!  inu  mwana  wa  Mtumiki,  ine  ndidamva  kuti  amene  adadula  mutu  bambo  anu  ndi  Shimr  osati Harimalah, ndipo   Harimalah  ameneyu  adali  kukhala  ku  Kufah.  Imam  Sajjad  adayankha  nati: Inde,   ndizoona  kuti  Shimr  ndiyemwe  adadula  mutu  bambo  anga  ndipo  Mulungu  amuotche  iye  ndi  moto  waku jahannama. Koma  ntchito  yomwe  adachita  pa karbala  idaotcha  chiwindi  cha  bambo  anga  Husain(a).
Imam  Sajjad(a)  adamupangira  Harimalah  duwa  kuti  ambuye  Mulungu  muotcheni  Harimalah  ndi  moto  owopsa  yomwe  posadutsa  masiku  ambiri  idayankhidwa  pomwe  Mukhtar  Thaqafi  adalimbana  naye ndikumukumaniza  kenako  adamufunsa  kuti  talongosola  zomwe  udachita  ndi  Husain(a)?
 
Harimalah  adayankha  kuti  ndikanena  undisiya?  Mukhtar  adati  dziwa  kuti  kunena  kapena  osanena  uphedwa  basi. Harimalah  adati  ndinena  kuti  zikupweteke.  Ine   ndidabweretsa  ku  karbala  mivi  itatu  ya nsonga  zitatu,  umodzi  mwa  miviyi  ndidaphera  Ali Asghar  omwe  udazinga  khosi  lake  kuchokera  khutu  lina  kufikira  khutu  linanso
فذبحه  من الاذن  الى  الاذن  او من الوريد الى الوريد
Muviwu  udazinga  Ali Asghar  kuchokera  khutu  lina  kufikira  khutu  lina  kapena  kuchokera  nsemba  wina  kufikira  nsemba  wina.
Chifukwa  nthawi  imeneyi  Imam  Husain  adali  atamunyamula  Ali Asghar  ndikumamuonetsa  kwa  adaniwa  kuti  mwanayu  ali  ndiludzu  kwambiri  mugawireni  madzi  chifukwa  mukapanda  kutero  amwalira,  iye  wafika  poti  akuphupha-phupha monga  momwe  imapangira  nsomba  ikatuluka  mmadzi  ndikukhala  nthawi yayitali. Imam  Husain(a)  adali  kunena  kuti:
يا  قوم  ان لم ترحموني فرحم هذا  الطفل كيف يتلظى عطشاناً ، منّوا  على ابن المصطفى اما ترونه كيف يتلظى عطشاناً
E!  inu  anthu, ngati  simukufuna  kundimvera ine  chisoni  palibe  kathu  koma  mumvereniko  chisoni  mwana  uyu,  kodi  inu  simukuona  momwe  akuphuphira-phuphira  chifukwa  cha  ludzu?
Mumvereniko  chisoni  mwana  wa  Muhammad  Mustafah (s.a.a.w),  kodi  simukuona  momwe  akuphuphira-phuphira  ndi  ludzu?
Imam  Husain  akulankhula  chonchi  ndipomwe  Harimalah  adagenda muvi  wake  wa nsonga  zitatu.
فرماه حرملة بن كاهل الاسدى بسهم فذبحه  من الاذن  الى  الاذن  فى حجر الحسين
Kenako  Harimalah  bin  Kahil  Asadiy  adagenda muvi wake  omwe   udazinga  Ali Asghar  kuchokera  khutu  lina  kufikira  khutu  lina  ali mmanja  mwa  Husain(a).
Harimalah  adapitiliza  kunena  nati  muvi  wina  ndidamugenda  nawo  Imam  Husain(a)  pomwe  wina  ndidamugenda  nawo  Abdullah  bin  Husain(a). Apa  Imam  Sajjad(a)  adati: رحم الله المختار (( Mulungu  amuchitira  chifundo  Mukhtar)) 
و السلام على عبد الله بن الحسين  الطفل الرضيع  
ndipo  mtendere  ukhale  kwa  Abdullah bin Husain(a)  mwana  wang’ono oyamwa.
Nkhani  ikuti  nkhondo  itafika  pothina  Imam  Sajjad (a)  adatenga  lupanga  ndikubwera  malo  ankhondo  koma  Imam  Husain(a)  atamuona  adanena  kuti  mubwezeni  iyeyo  chifukwa  choti  mtundu wathu  upitilira  ndi  iyeyo  (komanso  Imamat). 
Imam  Husain  (a)  adakuwa  kuti  kodi  pali  amene  angandithandize?  Koma  tsoka  kwa  anthu  ngati  amenewa  ndiloti  sadamuyankhe  Imam  ameneyu  angakhale  anthu  omwe  amamulembera  makalata  kuti  abwere  ku  kufah.  Kenako  kudamveka  kukuwa  kuchokera  ku matenti  ake.  Atafunsa  kuti  zikukhala  bwanji,  Zainab  adayankha  kuti  mwana  yemwe  adali  muchikuta  chake  chifukwa  chakumva  mau  anu  wayamba  kulira  mpaka  kugwera  pansi. Husain(a)  adali  ndi  ana  ang’ono  kwambiri  omwe  adali  nawo  ku  karbala  monga  Ali Asghar,  Abdullah  ndi  mwana  yemwe  adabadwa  tsiku  lomweli  la  Ashura  ndipo  adaphedwa  ndi  anthu  owuma  mitima  ngati  amenewa.
Nthawi  yomwe  Husain  adali  atamutenga  Ali  Asghar  mmanja  mwake  akupempha  madzi,  Umar bin  Saad  adamuuza  Harimalah  kuti  ndichifukwa  chani  sukuyankha  Husain?  Harimalah  adati  kodi  ndiyambe  kugenda  bambo  kapena  mwana?  Umar  bin  Saad  adati  kodi sukuona  khosi  loyera  la  Ali Asghar ?  Mauwa  ali  ndi  matanthauzo  angapo, limodzi  mwa  iwo  ndi  ili:
- Ndiye  kuti  Imam  Husain(a)  adali  atamutenga  Ali Asghar  kutsogolo  kwake  osati  mmbali  kapena  kumbuyo.
Ali Asghar  ataphedwa,  Imam  Husain(a)  adali  kutenga  magazi  ake  ndikumaponya  kumwamba,  koma  chodabwitsa  ndichoti  magazi  amenewa  samabwerera  pansi. Imam  Husain(a)  adati:  ambuye  Mulungu  malo  a mwana  wanga  Ali Asghar   ndi a pamwamba  kuposa  a mwana  wa ngamiya  yemwe  adaphedwa  inu  ndikutumiza  mavuto.
Zomwe  Imam  Husain (a)  adapanga ndi  mwana wake  Ali Asghar  zidali  zosiyana  ndi momwe  adachitira  ndi  anthu  ena.  Mwanayu  ataphedwa  adatsika  pa  hachi  ndipo  adali  kuyenda kupita  kuma tenti  ndikubwerera,  kenako  padabwera  mzimayi  wina  kwa  iye  kenako  adapemphera  ndikumuika  mmanda. 
Mfunso  ndiloti  kodi  ndichifukwa  chiyani  Imam  Husain(a)  adali  kupempha  madzi  akudziwa  kuti  mwana  wake  wafika  malo onga  nsomba oti  apatsidwe  madzi  kapena  osapatsidwe  amwalirabe?
Yankho  ndiloti  Imam  Husain  adachita  izi  kuti  mwina  papezeka  munthu  wina  omva  chisoni  ndikubwerera munjira  ya  Mulungu  ndikuongoledwa.Koma  anthuwa  adali  olimba  mitima  kuti  sadamve  chisoni  koma  kupha  mwana  wang’ono  ngati  ameneyu. Angakhale  pambuyo  poti  mwanayu  adaikidwa  mmanda  adali  kunena  kuti  chifukwa  chiyani  Husain waika  mmanda  mwana  wake  ndikusiya  anthu  ena  osawaika?  Inde, Imam  Husain(a)  amadziwa  kuti  anthu  omwe  aphedwe  pamalowa  mitu  yawo  idulidwa  ndikuikidwa  kunsonga  kwa  mikondo,  kodi  kamutu  ka  Ali  Asghar kali ndikupirira  koikidwa  kunsonga  kwa nkondo? Iye  ankadziwa  kuti  thupi  lake  lipondedwa-pondedwa,  nanga  anthu  inu  kathupi ka  Ali Asghar  kali ndikupirira  koti kapondedwe-pondedwe?
Padalinso  chiyembekezo  choti  ngati  anthu  oipa  amenewa  achitira  chisoni  mwana  wa  miyezi  isanu  ndi umodzi  mwina  achitira  chisoni  ana  a zaka  zitatu,  koma  anthu  oipisitsa  ngati  awa  sadamvere  chisoni  mwana  wa  miyezi  isanu  ndi  umodzi.
Abu  Khalif  yemwe  ndi  mmodzi  mwa  anthu  omwe  adali  otenga  ma fosholo ku  karbala   omwe  (wamkulu  wawo  adali Abu Ayyub), adabweretsedwa  kwa  Mukhtar.  Iye  adamufunsa  Abu Khalif  kuti : kodi  ungakumbukire  nthawi  yomwe  udamvako   chisoni  ndi  Husain? Iye  adati:  nthawi  yomwe  Husain  adamutenga  Ali  Asghar  ndipo  adali  mmanja  namayenda  naye  kupita  kumatenti  ake  ndikumabwerera, kenako  ndidamuona  mkazi  wina  adabwera  kwa  iye  kenako  Imam  Husain  adamuika  mmanda  Ali Asghar.  Apa  Mukhtar  adasinthika  nkhope  chifukwa  cha  izi  kenako  adati  palinso  zina? Adati  inde,  ataikidwa  mwanayu anthuwa  adabwera  ndikukumba  malo  omwe  adaikidwa  mwanayu  ndikutulutsa  mtembo  wake.
Mulungu  akudalitseni  polilira  Husain(a)  ndi  mwana  wake.