4-  قال عليه  السلام :
 إنّ  قوماً  عبدوا الله  رغبةً  فتلك  عبادة  التجار،  و إنّ  قوماً  عبدوا الله رهبةً فتلك  عباد العبيد، و إنّ  قوماً  عبدوا الله  شكراً  فتلك  عبادة  الاحرار وهي  أفضل  العبادة.

Imam  Husain (a)  adanena  kuti:  Ndithudi  pali  gulu lina  limapembedza  Mulungu  chifukwa  chofuna  zinthu  zina  kuchokera  kwa  iye, mwachoncho  kupembedza  koteroku  ndi kwa  Malonda,  palinso  gulu  lina  lomwe  limapembedza  Mulungu  chifukwa  chomuopa   iye,  kupembedza  koteroku  ndi kwa  kapolo, pomwe  gulu  lina  limapembedza  Mulungu  chifukwa  chofuna  kumuthokoza  ndikumuyamika  chifukwa  cha  zomwe  adamupatsa  kapolo  wake, kupembedza  koteroku  ndi kwa  afulu komwenso  ndikupembedza  kwa pamwamba  ndikwabwino  kuponsa  mitundu  ina  yonse  yakupembedza.

Muhadithiyi  tamva  mitundu  yakupembedza  yomwe akapolo  a Mulungu  amakhala  akupembedza  pakati  pawo.
Kupembedza  koyamba  ndikoti  munthu  amapembedza  Mulungu  chifukwa  choti  amalakalaka  kukapeza  zabwino  zomwe  Mulungu  adamulonjeza  kapolo  wake  monga mtendere,  ndipo  ku mtendere  kumeneku  kuli  zabwino  zambiri  zomwe   amene  akalowe  akakhala  akupatsidwa  monga  zakudya  zabwino, akazi  okongola  kolapitsa,  zipatso  zokoma,  zakumwa  zabwino  ndi zina.  Koma  kupembedza  koteroku  kukufanana  ndi  munthu  yemwe  amachita  malonda  chifukwa  choti  wamalonda  amatenga  katundu wake  ndikupititsa  kunsika  komwe  kuli  kuzipatsa  ntchito  yayikulu  koma amadziwa  kuti pali  chomwe  apeze  kuchokera  mu ntchito  akhale  akupanga.
Kupembedza  kwachiwiri  ndikoti  munthu  amapembedza  Mulungu   ndicholinga  choti  akumuopa  iye. Kupembedza  uku  ndikwa  kapolo,  chifukwa  choti  kapolo  amadziwa  nthawi  zonse  kuti  Mulungu  ndiye  bwana  wake pomwe  iye  ndikapolo wa iye  choncho  amayembekezera  kuti  nthawi ina  iliyonse  bwana  wake  amulamula  kugwira  ntchito  ina  ili  yonse  choncho  amakhala  okonzeka  nthawi  yomwe  akumulamula  kuti  amupembedze  bwana  wake  iye  nthawi  yomweyo  popanda  kuyang’ana  zolowa  amapembedza.
Kupembedza  kwachitatu  ndikoti  munthu  amamupembedza  Mulungu  chifukwa  choti  akufuna  kumuyamika  ndikumuthokoza  chifukwa  choti akudziwa  kuti  iye  ndi amene  ali  oyenerezeka  kupembedzedwa  posakhala  wina  komanso  ndi mwini  zonse   zimene  munthu  amakhala  nazo,  chifukwa  kuyamika  kumakhala  kuti  munthu  watsimikiza  kuti  ubwino  onse  komanso  zochitika  zonse  ndi  mtendere  onse  omwe  iwe  wakupeza  panthawi imeneyi  wachokera  kwa uyo  amene  ukumuyamika,  munthu  yemwe  amapembedza  Mulungu   amakhala  kuti  ali ndichikhulupiriro  kwa  Mulungu popanda  kuperewera  kwina  kuli  konse  mkati  mwake   pachifukwa  chimenechi  kupembedza uku  ndikwapamwamba  kuposa  kupembedza  komwe  kwatchulidwa.
Mfundo  zomwe  tikuzipeza mu hadithiyi  ndi  monga:
1. Munthu  ayenera  kupanga  china chilichonse  chifukwa  cha  Mulungu, kaya munthu  akufuna  kukapanga  udhu  kuti  apemphere  ayenera  kupanga  chifukwa  cha  Mulungu  chifukwa  akapanda  kutero  ndiye  kuti  udhu  wake  ukhala  owonongeka,  nthawi  yomwe  munthu  akuima  pamapemphero  ena  ali onse  ayenera  kuima  chifukwa  cha  Mulungu.

2. Muhadith  ina   muli  mau  akuti:  Mulungu  adawauza  akapolo ake  omwe  adali  kumupembedza  iye kuti  akalowe  kumoto,  akapolowa  chifukwa  choti  adali  ndichikhulupirira  chonse  kwa  Mulungu  adanyamuka  ulendo  opita  ku moto  koma  atafika  kumoto  kuja  adapeza  kuti  moto  kulibe  koma  mtendere,  apa  Mulungu  adafuna  kwayesa  chikhulupiriro  chawo  koma  kuti  anthuwa  adali  ndichikhulupiriro  chonse  kwa  Mulungu  wawo  motero  adapambana.
3.  Munthu  ayenera  kupembedza  Mulungu  posayang’ana  kuti  amulipira  chiyani,  inde  mitundu  ina yakupembedza  sikuti  palivuto  loti  yemwe  akupembedza  Mulungu  chifukwa  chofuna  zomwe  Mulunguyo  adalonjeza  ndiye  kuti  kupempherako ndikosalondola ayi  koma  apa  pakungolongosoredwa  mtundu  omwe  uli  wabwino  kwa  kapolo  kusankha   kuti  akapeze  mtendere  wapamwamba   monga  momwe  tikudziwira  kuti  mtendere  uli  mmagulu angapo.
4.  Munthu  ayenera  kupembedza  Mulungu  mwachikondi  chake  chonse  kwa  iye.
5.  Tikafuna  kutchula  chitsanzo  cha  kapolo  yemwe   adasankha  gulu  lachitatuli  ndiye  ndi mwini  wake  amene  akuti  phunzitsa  hadithiyi  yemwe  ali  Imam  Husain (a)  chifukwa  iye  adali   kupembedza  Mulungu  wake  moyenerezeka  monga  momwe  talongosolera  mugulu   lachitatu.  Munthu  wina  otchedwa  Hilalu  ataona  kuti  Husain (a) wagwa pansi   adapita  pomwe  iye  adagona  ndicholinga  choti  akamuone  ngati  wafa,  atafika  adamupeza  kuti  wagona  pansi  ndipo  adali  kulankhula  mau  ndimilomo  yake  youma,  Hilalu akunena  kuti  ndidaganiza  kuti  mwina  Husain akutembelera  anthu  omwe  amupanga  zinthu  zoipa  ngati  zimenezi,  koma nditamuyandikira  ndikumvetsera  zomwe  amalankhula  ndidamumva  akunena  mau  awa "E!   Mulungu  wanga,  chisangalalo  changa chili  muchisangalalo chanu, ine ndagonjera  muchilamulo chanu ndipo  ndili opilira  ku mavuto  anu  palibenso  Mulungu  wina  opembedzedwa  koma inu  nokha". Nditamva  mauwa  ndidazizwa  kwambiri  ndipo  ndidafunsa  kuti  kodi  iwe  ndindani,  kodi  ndi  Mtumiki  kapena  munthu wamba?  Apatu  taona  mmene  Imam  Husain(a)  chikhulupiriro  chake  chilili  kumbali  ya  Mulungu  komanso  ndikupembedza  kwake.
Zomwe  zidachitika  pamalowa  zidali  zoti  Imam Husain(a) adali  kubweza  kwa  Mulungu  wake  zinthu  zomwe  adasungitsidwa   monga  miyendo, mikono,  mano,  maso,  makutu, thupi ndi  zina  chifukwa  choti  iye  adalolera  kuti  adani  athe  kuli menya ndikulizunza  thupi  pofuna  kuti  chilamulo  cha  Mulungu  chisabisike  koma chioneke  poyera, ndichifukwa  chake    Mulungu adasangalatsidwa naye  pomwe  akunena  mu  surat  Fajir  ma aya omalizira (27-30)  kuti : "E!  iwe  mtima  okhazikika  ndichilamulo  cha  Mulungu,  bwelera  kwa  Mulungu  wako  uli  osangalala  ndi osangalalidwa   ndi  Mulungu  wako, lowa  mu mtendere  omwe  akapolo  anga  alowa  kale, inde  lowa  mu mtendere  wanga."